பாஜக தேசிய செயல் தலைவராக ஜே.பி நட்டா தேர்வு

பாரதிய ஜனதா கட்சியின் தேசிய செயல் தலைவராக கட்சியின் மூத்த தலைவர் ஜே.பி.நட்டா தேர்வு செய்யப்பட்டுள்ளார்.

பாஜக நாடாளுமன்ற குழுக் கூட்டம் டெல்லி உள்ள அக்கட்சியின் தலைமை அலுவலங்கத்தில் இன்று நடைபெற்றது. இந்தக் கூட்டத்தில் பிரதமர் மோடி, மத்திய அமைச்சர்கள் அமித்ஷா, ராஜ்நாத் சிங், நிதின் கட்காரி உள்ளிட்டோர் கலந்துக் கொண்டனர். இந்தக் கூட்டத்தில் ஜே.பி.நட்டா பாஜகவின் தேசிய செயல் தலைவராக தேர்வு செய்யப்பட்டுள்ளார்.

தேசிய செயல் தலைவராக தேர்வு செய்யப்பட்ட நட்டாவிற்கு அமித்ஷா பூங்கொத்து கொடுத்து வாழ்த்து தெரிவித்தார். பிரதமர் மோடி, ராஜ்நாத் சிங் உள்ளிட்டோரும் அவருக்கு வாழ்த்து தெரிவித்தனர். ஜே.பி.நட்டா கடந்த பாஜக ஆட்சியில் மத்திய சுகாதார மற்றும் குடும்பநல அமைச்சராக இருந்தார். இந்தத் தேர்தலில் அவர் போட்டியிடவில்லை. 

அமித்ஷா உள்துறை அமைச்சராக பொறுப்பேற்றதால் அவர் வகித்து வந்த பாஜக தலைவர் பதவி வேறொருவருக்கு வழங்கப்படும் என்று பேசப்பட்டது. இருப்பினும், சமீபத்தில் நடைபெற்ற பாஜக தலைவர்கள் கூட்டத்தில் பல்வேறு மாநிலங்களில் சட்டப்பேரவை தேர்தல் வரவுள்ளதால் பாஜக தலைவராக அமித்ஷாவே நீடிப்பார் என முடிவு எடுக்கப்பட்டது. இந்த நிலையில், செயல் தலைவராக நட்டா தேர்வு செய்யப்பட்டுள்ளார்.