ஆர்.கே.நகர் இடைத்தேர்தல் நடக்குமா?: திருமாவளவன் சந்தேகம்

ஆர்.கே.நகர் இடைத்தேர்தல் நடக்குமா என்பது கேள்விக்குறியாக இருப்பதாக விடுதலை சிறுத்தைகள் கட்சியின் தலைவர் தொல். திருமாவளவன் தெரிவித்துள்ளார்.

கன்னியாகுமரி மாவட்டம் நாகர்கோவில் ஆட்சியர் அலுவலகம் முன்பு விடுதலைச் சிறுத்தைகள் கட்சியின் சார்பில் இன்று கண்டன ஆர்ப்பாட்டம் நடைபெற்றது. அப்போது, கன்னியாகுமரி மாவட்டத்தை தேசிய பேரிடர் பகுதியாக அறிவிக்க வேண்டும், காணாமல் போன மீனவர்களை விரைந்து மீட்க வேண்டும், பாதிக்கப்பட்ட விவசாயிகளுக்கு உரிய இழப்பீடு வழங்க வேண்டும் என்பன உள்ளிட்ட கோரிக்கைகள் வலியுறுத்தப்பட்டன.

பின்னர் பேசிய திருமாவளவன், பணப்புழக்கம் இல்லாமல், நேர்மையான முறையில் தேர்தல் நடைபெற தேர்தல் ஆணையம் நடவடிக்கை எடுக்க வேண்டும் என வலியுறுத்தினார்.ஏராளமான போலி வாக்காளர்கள் இருப்பது நீதிமன்றம் மூலம் உறுதி செய்யப்பட்ட நிலையில், அவற்றை நீக்க நடவடிக்கை எடுக்க வேண்டும் என வலியுறுத்திய அவர், ஆர்.கே.நகர் இடைத்தேர்தல் நடக்குமா என்பது கேள்விக்குறியாக இருப்பதாகவும் கூறினார்.