’தளபதி’க்கு பின் மீண்டும் இணையும் ரஜினி, மம்மூட்டி!

’தளபதி’ படத்துக்கு பிறகு ரஜினிகாந்தும் மம்மூட்டியும் மீண்டும் இணைந்து நடிக்க இருக்கின்றனர்.

மணிரத்னம் இயக்கத்தில் ரஜினிகாந்த், மம்மூட்டி நடித்த படம், ‘தளபதி’. இளையராஜா இசை அமைத்திருந்த இந்தப் படம், 1991-ம் ஆண்டு வெளியாகி சூப்பர் ஹிட்டானது. இதையடுத்து இவர்கள் நடிக்கும் படத்தை மணிரத்னம் இயக்கப் போவதாக தகவல்கள் கசிந்தன. இந்தப் படம் அடுத்த வருடம் தொடங்க இருப்பதாகவும் கூறப்பட்டது. ’காலா’ படத்திலும் மம்மூட்டி சிறப்பு தோற்றத்தில் நடிப்பதாகக் கூறப்படுகிறது.

இந்நிலையில் ரஜினியும் மம்மூட்டியும் மராத்தி படம் ஒன்றில் நடிக்க இருக்கின்றனர். இந்தப் படத்தை தீபக் பாவே என்ற இயக்குனர் இயக்குகிறார். படத்துக்கு ’பஷாயடன்’ என்று டைட்டில் வைத்துள்ளனர். அரசியல்வாதியும் தயாரிப்பாளருமான பாலகிருஷ்ணா சர்வே தயாரிக்கிறார். 

அடுத்த வருடம் பிப்ரவரி மாதம் இதன் ஷூட்டிங் தொடங்குகிறது. தீபக், ’இடாக்’ என்ற படத்தில் கோ -ரைட்டராக பணியாற்றியவர். இந்தப் படம் இப்போது கோவாவில் நடக்கும் சர்வதேச திரைப்பட விழாவில் திரையிடப்பட்டு பாராட்டுகளைப் பெற்றது என்பது குறிப்பிடத்தக்கது.