ரெஜினாவுக்காக 20 லட்சம் பேர்: சூரி சொன்ன திடுக்

உதயநிதி ஸ்டாலின், ரெஜினா, சூரி, மன்சூர் அலிகான், யோகிபாபு உட்பட பலர் நடித்த படம், ‘சரவணன் இருக்க பயமேன்’. எழில் இயக்கி இருந்தார். இந்தப் படத்தின் சக்சஸ் மீட் சென்னையில் நேற்று நடந்தது.

உதயநிதி ஸ்டாலின் பேசும்போது, ‘எனக்கு மிகப்பெரிய வெற்றி கொடுத்தப் படம், ’ஒரு கல் ஒரு கண்ணாடி’. அடுத்து ’கதிர்வேலன் காதல்’ டீசண்டான வெற்றியை கொடுத்தது. அதற்கடுத்து நான் பண்ணின படங்கள் எதிர்பார்த்த அளவு போகலைன்னாலும் தப்பான படங்கள் பண்ணலைன்னு தெளிவா இருந்தேன். அதுக்கு அடுத்து கமர்சியலா, பி அண்ட் சி வரை ரீச் ஆகுற அளவுக்கு இந்தப் படத்தைக் கொடுத்த எழில் சாருக்கு நன்றி’ என்றார்.

சூரி பேசும்போது, ‘இந்தப் படத்தில் இடம்பெற்ற பாட்டு, ’எம்புட்டு இருக்குது ஆசை..’ 20 லட்சத்தை தாண்டி போயிருக்குன்னு சொன்னாங்க. இந்தப் பாடலை ரெஜினாவுக்காக யுகபாரதியும் இமான் அண்ணனும் உருவாக்குன மாதிரி இருக்கு. ரெஜினாவுக்காகவே 20 லட்சம் பேர் இந்தப் பாட்டை பார்த்திருக்கிறதா சொல்றாங்க. இன்னும் பல லட்சத்தை தாண்டும் போல தெரியுது. இமான் அண்ணே இது போல நிறைய பாடல்களை கொடுக்கணும்னே’ என்றார்.

இயக்குனர் எழில், ரெஜினா, யோகிபாபு, சாம்ஸ், டி.இமான், ஒளிப்பதிவாளர் கே.ஜி.வெங்கடேஷ் உட்பட பலர் கலந்துகொண்டனர்.