தனியார் ஆம்னி பேருந்துகள் இயக்கம் நிறுத்தம் 

காவேரி மருத்துவமனை சற்று முன்பு வெளியிட்ட அறிக்கையில், “திமுக தலைவர் கருணாநிதியின் உடல்நிலை மிகவும் கவலைக்கிடமாக உள்ளது. தொடர்ந்து மருத்துவ சிகிச்சை அளித்தும் அவரது முக்கிய உடல் உறுப்புகளை செயல்பட வைப்பதில் சிக்கல் நிலவுகிறது” என்று குறிப்பிடப்பட்டு இருந்தது. 

கருணாநிதி கவலைக்கிடம் என்ற செய்தியைக் கேட்டு காவேரி மருத்துவமனை முன் குவிந்துள்ள தொண்டர்கள் கண்ணீர் மல்க கதறி வருகின்றனர். கருணாநிதியின் கோபாலபுரம் இல்லத்திற்கு திமுக தொண்டர்கள் வரத் தொடங்கியுள்ளனர். அதேபோல், காவேரி மருத்துவமனை பகுதியிலும் ஆயிரக்கணக்கான தொண்டர்கள் குவிந்துள்ளனர். சென்னை கோபாலபுரத்தில் திமுக தலைவர் கருணாநிதி இல்லம் வழியாக வாகனங்கள் செல்ல தடை விதிக்கப்பட்டுள்ளது.

இந்நிலையில், திமுக தலைவர் கருணாநிதியின் உடல்நிலை கவலைக்கிடமாக உள்ளநிலையில், தமிழகம் முழுவதும் தனியார் ஆம்னி பேருந்துகள் இயக்கம் நிறுத்தப்பட்டுள்ளது. குறிப்பாக நெல்லை, தூத்துக்குடி, கன்னியாகுமரி மாவட்டங்களில் இருந்து சென்னை செல்லும் தனியார் ஆம்னி பேருந்துகள் இயக்கம் நிறுத்தப்பட்டுள்ளது.