12 வயதுக்குட்பட்ட சிறுமிகளை பாலியல் வன்கொடுமைக்கு ஆளாக்கினால் 20 ஆண்டு கடுங்காவல் சிறை தண்டனை முதல் அதிகபட்சம் மரண தண்டனை வரை விதிக்க வழிவகுக்கும் சட்டத்திருத்தம் மக்களவையில் நிறைவேறியது.

பாலியல் வன்கொடுமையில் ஈடுபடுபவர்களுக்கு தற்போது குறைந்த பட்சமாக 7 ஆண்டு சிறை தண்டனை வழங்கப்பட்டு வரும் நிலையில் இதை 10 ஆண்டுகளாக உயர்த்தவும் புதியசட்டத்திருத்தம் வழிவகுக்கிறது. 16 வயதுக்குட்பட்ட சிறுமியரை வன்கொடுமைக்கு ஆளாக்கும் போது குறைந்த பட்சம் 20 ஆண்டு கடுங்காவல் தண்டனையிலிருந்து அதிகபட்சம் ஆயுள் தண்டனை வரலாம் என இந்தச் சட்டம் கூறுகிறது. 16 வயதுக்கு மேற்பட்டவர்களை பாலியல் பலாத்காரத்திற்குள்ளாக்கும் போது குறைந்த பட்சம் 10 ஆண்டு சிறையிலிருந்து அதிகபட்சம் ஆயுள் தண்டனை வரை விதிக்க முடியும். மேலும் பாலியல் பலாத்கார சம்பவங்களில் முதல் தகவல் அறிக்கை பதிவு செய்த 2 மாதத்திற்குள் விசாரணையை நிறைவு செய்ய வேண்டும் எனவும் இச்சட்டத்தில் கூறப்பட்டுள்ளது. 

16 வயதுக்குட்பட்ட சிறுமியர் பாலியல் வன்கொடுமைக்கு ஆளான வழக்குகளில் முன்ஜாமீன் வழங்கப்படாது எனவும் சட்டத்திருத்தத்தில் கூறப்பட்டுள்ளது. மேலும் பாலியல் வழக்குகளுக்கு விரைந்து தீர்வு காண விரைவு சிறப்பு நீதிமன்றங்களும் அமைக்கப்பட உள்ளதாக மத்திய உள்துறை இணையமைச்சர் கிரண் ரிஜிஜு மக்களவையில் தெரிவித்தார். இம்மேசாதா அடுத்து மாநிலங்களவையில் நிறைவேற்றப்படவேண்டியுள்ளது.