Published : 27,Oct 2017 05:27 AM

சுவிஸ் ஜோடி தாக்கப்பட்ட குற்றத்திற்காக 5 சிறுவர்கள் கைது

5-minors-detained-for-attack-on-Swiss-couple

சுவிட்சர்லாந்து ஜோடி மீது நடத்தப்பட்ட கொலை வெறித்தாக்குதல் தொடர்பாக, உத்தரப் பிரதேசத்தில் 5 சிறுவர்கள் கைது செய்யப்பட்டனர்.

சுவிட்சர்லாந்தை சேர்ந்தவர் குயன்டின் ஜெரேமி கிளர்க் (24). இவரது தோழி மேரி டிரோஸ் (24). இருவரும் இந்தியாவைச் சுற்றிப் பார்க்க வந்துள்ளனர். உலக அதிசயமான தாஜ்மகாலைப் பார்த்த அவர்கள், பிறகு அங்கிருந்து 40 கி.மீ தூரத்திலுள்ள ஃபதேப்பூர் சிக்ரிக்கு கடந்த ஞாயிறன்று சென்றனர். உள்ளூரைச் சேர்ந்த சிறுவர்கள் சிலர், அவர்களுடன் செல்ஃபி எடுக்க முயன்றுள்ளனர். அப்போது அவர்களுக்குள் தகராறு ஏற்பட்டுள்ளது. இதையடுத்து கல் மற்றும் தடியால் சுவிட்சர்லாந்து ஜோடியை அவர்கள் தாக்கியுள்ளனர். இதில் அவர்களுக்கு எலும்பு முறிவு ஏற்பட்டதால், டெல்லியில் உள்ள மருத்துவமனைக்கு அவர்கள் அனுப்பி வைக்கப்பட்டனர்.

இந்த சம்பவம் தொடர்பாக மத்திய வெளியுறவுத் துறை அமைச்சர் சுஷ்மா ஸ்வராஜ், உத்தரப் பிரதேச அரசிடம் விளக்கம் அளிக்குமாறு கேட்டிருந்தார். இந்நிலையில் சுவிட்சர்லாந்த் ஜோடியை தாக்கிய குற்றத்திற்காக 5 சிறுவர்களை போலீஸார் கைது செய்துள்ளனர். இதுதொடர்பாக தகவல் கூறியுள்ள ஆக்ரா காவல்துறை உயர் அதிகாரி அமித் பதாக், சுவிட்சர்லாந்து ஜோடியினர் அளித்த தகவலின் படி, இரண்டு சிறுவர்களை கைது செய்துள்ளோம் என்றும், ஜூடானா கிராமத்தை சேர்ந்த சகோதரர்களான அவர்கள், 18 வயதுக்கு உட்பவர்கள் என்று கூறியுள்ளார். அத்துடன் அவர்கள் மீது வழக்கு பதிவு செய்யப்பட்டுள்ளதாகவும், இந்த சம்பவம் தொடர்பாக மேலும் 3 சிறுவர்கள் கைது செய்யப்பட்டுள்ளதாகவும் தெரிவித்தார்.

சற்று முன்



எடிட்டர் சாய்ஸ்