முதல் முறையாக டி20 உலகக் கோப்பையை வென்றது ஆஸ்திரேலியா!

கிரிக்கெட் உலகில் ஆஸ்திரேலிய அணி வெல்லாத ஒரே கோப்பையாக இருந்து வந்தது டி20 உலகக் கோப்பை தான். ரிக்கி பாண்டிங், கிளார்க், பெய்லி, ஸ்மித் என நான்கு கேப்டன்களால் முடியாததை முடித்துக் காட்டியுள்ளார் ஆரோன் பின்ச். 

ஐந்து முறை ஒருநாள் உலகக் கோப்பையை வென்ற அணி ஆஸ்திரேலியா. இருந்தாலும் அந்த அணியால் டி20 உலகக் கோப்பையை வெல்ல முடியவில்லை என்ற ஏக்கம் தற்போது முடிவுக்கு வந்துள்ளது. 

துபாய் கிரிக்கெட் மைதானத்தில் நடைபெற்ற நடப்பு டி20 உலகக் கோப்பை தொடரின் இறுதிப் போட்டியில் நியூசிலாந்து அணி நிர்ணயித்த 173 ரன்களை சுலபமாக சேஸ் செய்து வென்றது ஆஸ்திரேலியா. 

மூன்றாவது ஓவரில் கேப்டன் பின்ச், 5 ரன்களில் அவுட்டானார். இருந்தும் டேவிட் வார்னர் மற்றும் மிட்செல் மார்ஷ் 92 ரன்களுக்கு பார்ட்னர்ஷிப் அமைத்திருந்தனர். அது அணிக்கு வெற்றிக் கூட்டணியாக அமைந்தது. வார்னர் 38 பந்துகளில் 53 ரன்கள் எடுத்து அவுட்டானார். 

பின்னர் களத்திற்கு வந்த மேக்ஸ்வெல் உடன் கூட்டு சேர்ந்து நியூசிலாந்து அணியின் பந்துவீச்சை போட்டுத் தாக்கினார் மார்ஷ். 50 பந்துகளில் 77 ரன்களை எடுத்தார் அவர். மறுபக்கம் மேக்ஸ்வெல் 18 பந்துகளில் 28 ரன்களை எடுத்தார். 

18.5 ஓவர்கள் முடிவில் 2 விக்கெட் இழப்பிற்கு 173 ரன்களை எடுத்தது ஆஸ்திரேலியா. அதன் மூலம் 8 விக்கெட் வித்தியாசத்தில் வெற்றி பெற்றது ஆஸ்திரேலியா.