சிறுமியை கடத்திச் சென்ற பெங்களூரு இளைஞர் போக்சோ சட்டத்தில் கைது

திருவண்ணாமலை மாவட்டம் வந்தவாசி அடுத்த தாடிநொளம்பை கிராமத்தில் 17 வயது சிறுமியை கடத்திச் சென்ற இளைஞரை போக்சோ சட்டத்தின் கீழ் போலீசார் கைது செய்தனர்.

பெங்களூரை சேர்ந்த ராஜா மகன் லக்கீத். இவர், டயர் கடையில் ஊழியராக பணியாற்றி வருகிறார். இந்த நிலையில் கொரோனா ஊரடங்கு காரணமாக லக்கீத் வந்தவாசி அடுத்த தாடிநொளம்பை கிராமத்தில் உள்ள அவரது உறவினர் வீட்டில் கடந்த 8 மாதங்களாக தங்கி வருகிறார். இந்நிலையில், அதே பகுதியைச் சேர்ந்த 17 வயது சிறுமியை கடத்திச் சென்றுள்ளார்.

சிறுமியின் தந்தை பல இடங்களிலும் சிறுமியை தேடிப்பார்த்தும் கிடைக்காததால் வட வணக்கம் பாடி காவல் நிலையத்தில் புகார் செய்துள்ளார். புகாரின் பேரில் போலீசார் வழக்குப்பதிவு செய்து சிறுமியை தேடிவந்தனர்.

இதையடுத்து பெங்களூரை சேர்ந்த லக்கீத் என்பவர் தான் சிறுமியை கடத்திச் சென்றது தெரியவந்தது. இதையடுத்து போலீசார் லக்கீத்தை போக்சோ சட்டத்தின் கீழ் கைது செய்து சிறுமியை மீட்டு பெற்றோரிடம் ஒப்படைத்தனர்.