“ஒரு குடும்பம் ஆள்வதற்கு அதிமுக ஒருபோதும் தலை வணங்காது” - முதல்வர் பழனிசாமி

ஒருபோதும் அவர்களை அதிமுகவில் இணைக்க முடியாது என சசிகலா, தினகரனை பற்றி முதலமைச்சர் எடப்பாடி பழனிசாமி மறைமுகமாக பேசியுள்ளார்.

கிருஷ்ணகிரியில் முதலமைச்சர் எடப்பாடி பழனிசாமி பரப்புரையில் ஈடுபட்டு வருகிறார். அப்போது பேசிய அவர், “மீண்டும் அவர் புறப்பட்டுவிட்டார். 4 ஆண்டு காலம் அலைந்து அலைந்து பார்த்தார். நான் சொல்வது யார் என்று உங்களுக்கு தெரியும். டிடிவி தினகரன். அவர் கட்சியில் 10 ஆண்டு காலம் கிடையாது. ஜெயலலிதா இருந்தபோது அடிப்படை உறுப்பினர் பதவியில் இருந்து நீக்கப்பட்டவர்.

ஏதோ சந்தர்ப்பவாதத்தில் கட்சியில் இணைந்து கொண்டார். இப்போது சதி வேலை செய்து கொண்டிருக்கிறார். ஒருபோதும் அவர்களை அதிமுகவில் ஏற்றுக்கொள்ளவே முடியாது. இது தொண்டர் ஆளுகின்ற கட்சி. உழைப்பால் உயர்ந்த கட்சி. ஒரு குடும்பம் ஆள்வதற்கு அதிமுக ஒருபோதும் தலை வணங்காது. அடிமட்ட தொண்டனாக இருப்போர் மட்டும்தான் அதிமுகவிலிருந்து இனி முதலமைச்சராக முடியும்” என்றார்.