அஞ்சல்துறை தேர்வு மொழி பட்டியலில் தமிழ் இடம்பெறாதது ஏற்புடையதல்ல: தினகரன்

அஞ்சல் துறை தேர்வுகளுக்கான மொழிகளின் பட்டியலில் தமிழ் இடம்பெறாமல் இருப்பது ஏற்புடையதல்ல என்று அமமுக பொதுச்செயலாளர் டிடிவி.தினகரன் தெரிவித்திருக்கிறார்.

இது தொடர்பாக டிடிவி.தினகரன் வெளியிட்டுள்ள ட்விட்டர் பதிவில் “அஞ்சல் துறை தேர்வுகளுக்கான மொழிகளின் பட்டியலில் தமிழ் இடம்பெறாமல் இருப்பது ஏற்புடையதல்ல. ஏற்கனவே இது தொடர்பாக மத்திய அரசு அளித்திருந்த வாக்குறுதியின்படி தமிழிலும் அஞ்சல் தேர்வுகள் நடத்தப்பட வேண்டும். எனவே, இதற்காக தற்போது வெளியிடப்பட்டுள்ள அறிவிப்பை திருத்தம் செய்ய வேண்டும் எனக் கேட்டுக்கொள்கிறேன்” எனக்கூறியிருக்கிறார்

அஞ்சல் துறை தேர்வுகளுக்கான மொழிகளின் பட்டியலில் தமிழ் இடம்பெறாமல் இருப்பது ஏற்புடையதல்ல. (1/2)

— TTV Dhinakaran (@TTVDhinakaran) January 7, 2021

 அஞ்சல் துறையில் கணக்கர் உள்ளிட்ட பல பணியிடங்களுக்கான தேர்வு வரும் பிப்ரவரி 14 ஆம் தேதி நடைபெறும் என்று அறிவிக்கப்பட்டுள்ளது. இன்று இந்த தேர்வுகள் குறித்து வெளியான மொழிகள் பட்டியல் அறிவிப்பில், ஆங்கிலம் மற்றும் இந்தி மட்டுமே இடம்பெற்றுள்ளது. ஏற்கனவே கடந்த ஆண்டு அஞ்சல் துறை தேர்வில் தமிழ் புறக்கணிக்கப்பட்டிருந்ததால், தமிழகத்தில் பல்வேறு கட்சிகளும் கடும் கண்டனம் தெரிவித்தன. இதன்பின்னர் வரும் ஆண்டு முதல் அஞ்சல் தேர்வுகளில் தமிழும் இடம்பெறும் என மத்திய அரசு உறுதியளித்தது.