ஊரடங்கு: நீதிமன்ற பணிகள் நடக்குமா? என்ன சொல்கிறது உயர் நீதிமன்ற நிர்வாகக் குழு?

21 நாட்கள் ஊரடங்கை அடுத்து சென்னை உயர்நீதிமன்றம், மதுரை கிளை, தமிழகம் மற்றும் புதுச்சேரி கீழமை நீதிமன்ற பணிகள் அனைத்தையும் நிறுத்திவைத்து சென்னை உயர் நீதிமன்ற நிர்வாகக் குழு உத்தரவிட்டுள்ளது

நாட்டு மக்களிடையே நேற்று உரையாற்றிய பிரதமர் மோடி, 21 நாட்களுக்கு இந்தியா முழுவதும் ஊரடங்கு பிறப்பித்து உத்தரவிட்டார்.
நேற்று நள்ளிரவு முதல் ஊரடங்கு அமலுக்கு வந்தது. இந்நிலையில் நீதிமன்ற பணிகள் அனைத்தையும் நிறுத்திவைத்து சென்னை உயர்நீதிமன்ற நிர்வாகக் குழு உத்தரவிட்டுள்ளது.

இது குறித்து தெரிவித்துள்ள நிர்வாகக்குழு, அதிமுக்கியத்துவம் வாய்ந்த அவசர வழக்குகளை தாக்கல் செய்ய வேண்டும் என்றால் சம்பந்தப்பட்ட நீதிபதி அனுமதி பெற்று தாக்கல் செய்ய வேண்டும். அதன்பின் அந்த வழக்கின் விசாரணை நடைபெறும் இடம், நேரடி விசாரணையா அல்லது காணொளி காட்சி மூலம் விசாரணையா என மனுதாரர் மற்றும் வழக்கறிஞருக்கு தெரிவிக்கப்படும்.

நிர்வாக அல்லது நீதிமன்ற அலுவல் தொடர்பாக சென்னை மற்றும் உயர்நீதிமன்ற மதுரை கிளை பதிவாளர்களை மின்னஞ்சல் மூலம் தொடர்பு கொள்ள வேண்டும். கீழமை நீதிமன்றங்களில் மிக அவசர வழக்காக இருந்தால் மட்டுமே அந்ததந்த மாவட்ட முதன்மை நீதிபதியின் அனுமதியோடு வழக்கை விசாரணைக்கு எடுத்து கொள்ள வேண்டும் எனக் குறிப்பிட்டுள்ளது

தமிழகத்தில் தட்டுப்பாடு இன்றி குடிநீர் வழங்க ஏற்பாடு - தமிழக அரசு