சொத்து தகராறு... பாட்டி, தந்தையை சுட்டுக் கொன்ற இளைஞர்!

ஈரோடு அருகே பாட்டியையும், தந்தையையும் துப்பாக்கியால் சுட்டுக்கொன்ற இளைஞர் காவல்நிலையத்தில் ‌சரண் அடைந்துள்ளார். சொத்துத்தகராறில் நடந்துள்ள இந்த கொலை ஈரோடு வட்டாரத்தை அதிர வைத்துள்ளது.

ஈரோட்டை அடுத்த சித்தோடு வசுவபட்டியை சேர்ந்தவர் பாவாயி. இவரது மகன் பழனிச்சாமி. இருவரும் வீட்டில் இருந்த போது அங்கு வந்த பழனிசாமியின் மகன் சந்தோஷ்குமார், தந்தையின் பல கோடி ரூபாய் சொத்துகளை தன் பெயரில் மாற்றித்தருமாறு கேட்டதாகத் தெரிகிறது. அப்போது வாக்குவாதம் முற்றியதில், ஆத்திரமடைந்த சந்தோஷ்குமார் தனது கையில் வைத்திருந்த துப்பாக்கியால் பாட்டி பாவாயியையும், தந்தை பழனிசாமியையும் சுட்டார். குண்டுபாய்ந்த இருவரும் சம்பவ இடத்திலேயே குண்டு பாய்ந்து உயிரிழந்தனர்.

இதன்பின் சம்பவ இடத்திலிருந்து இருந்து தப்பியோடிய சந்தோஷ் குமார் தலைமறைவானார். சம்பவம் குறித்து பொதுமக்கள் கொடுத்த தகவலின் பேரில் அங்கு விரைந்து வந்த போலீசார் வீட்டில் பதிந்திருந்த தடயங்களை சேகரித்தனர். இந்நிலையில், கொலைக்கு பயன்படுத்திய துப்பாக்கியுடன் சந்தோஷ் குமார் காவல்நிலையத்தில் சரண் அடைந்துள்ளார். குடியிருப்புகள் நிறைந்த பகுதியில் நடைபெற்ற இந்த கொலை சம்பவம் அப்பகுதியில் பெரும் பரபரப்பை ஏற்படுத்தி உள்ளது.