ஜெயலலிதா பயோபிக்கில் எம்.ஜி.ஆர் ஆகிறார் அரவிந்த் சாமி!

மறைந்த முன்னாள் முதலமைச்சர் ஜெயலலிதாவின் வாழ்க்கை கதையில் நடிகர் அரவிந்த் சாமி, எம்.ஜி.ஆராக நடிக்கிறார். 

மறைந்த முன்னாள் முதலமைச்சர் ஜெயலலிதா, 2016ஆம் ஆண்டு டிசம்பர் 5ஆம் தேதி உடல்நலக்குறைவால் மருத்துவ மனையில் உயிரிழந்தார். அவரது வாழ்க்கை வரலாறு படமாகவுள்ளது. இந்த படத்திற்கு தலைவி என பெயரிடப்பட்டுள்ளது. ஜெயலலிதாவாக பிரபல இந்தி நடிகை கங்கனா ரனவ்த் நடிக்கிறார். ஏ.எல் விஜய் இயக்குகிறார். இவர், மதராசபட்டினம், தெய்வத்திருமகள், தலைவா உள்ளிட்ட பல படங்களை இயக்கியவர்.  

தமிழ், இந்தி, தெலுங்கு ஆகிய மூன்று மொழிகளில் உருவாகும் இந்தப் படத்துக்கு ஜி.வி. பிரகாஷ் குமார் இசையமைக்கிறார். நிரவ் ஷா ஒளிப்பதிவு செய்கிறார். பாகுபலி, ஆர்.ஆ.ஆர் படங்களில் கதாசிரியரும் இயக்குனர் ராஜமவுலியின் தந்தையுமான விஜயேந்திர பிரசாத் இதன் கதையை எழுதுகிறார். 

இந்நிலையில் இந்தப் படத்தில் எம்.ஜி.ஆராக நடிகர் அரவிந்த் சாமி நடிப்பதாகக் கூறப்பட்டு வந்தது. அவர் எம்.ஜி.ஆராக நடிப்பது, இப்போது உறுதியாகியுள்ளது.