சர்வதேச யோகா தினத்தை முன்னிட்டு நாய்கள் செய்த யோகா வீடியோ சமூக வலைத்தளங்களில் வைரலாகி வருகிறது. 

உலகம் முழுவதும் சர்வதேச யோகா தினம் இன்று கொண்டாடப்பட்டு வருகிறது. அதன் ஒரு பகுதியாக ஜார்க்கண்ட் மாநிலம் ராஞ்சியில் உள்ள பிரபாத் தாரா பள்ளி மைதானத்தில் நடைபெற்ற யோகா தின நிகழ்ச்சியில் பிரதமர் மோடி பங்கேற்றார். அந்த நிகழ்ச்சியில் உரையாற்றிய மோடி, மக்கள் அன்றாடம் யோகா செய்வதை பழக்கப்படுத்திக்கொள்ள வேண்டும் எனக் கேட்டுக் கொண்டார்.

இந்நிலையில் ஜம்மு-காஷ்மீர் பகுதியிலுள்ள எல்லை பாதுகாப்புப் படையின் நாய்கள் பிரிவை சேர்ந்த நாய்களும் அதன் பயிற்சியாளர்களும் யோகா செய்தனர். இது தொடர்பாக வீடியோ ஒன்று வெளியாகியுள்ளது. இந்த வீடியோவில் நாய்கள் தங்களின் பயிற்சியாளர்களுடன் சேர்ந்து யோகா ஆசனங்களை செய்கிறது போல் காட்சிகள் பதிவாகியுள்ளது. 

அதேபோல இந்திய ராணுவப்படையிலுள்ள நாய்கள் பிரிவிலுள்ள நாய்களும் ராணுவ வீரர்களுடன் இணைந்து யோகாசனம் செய்தன. இந்தப் புகைப்படங்களை இந்திய ராணுவத்தின் செய்தித்தொடர்பாளரின் ட்விட்டர் பக்கத்தில் பதிவிடப்பட்டுள்ளது. அந்தப் புகைப்படத்தில் ராணுவ வீரர்கள் ஒருபுறமும் நாய்கள் அவர்களுக்கு எதிர்புறமும் இருந்து யோகா செய்வது போல் உள்ளது. 

இந்தப் புகைப்படங்களும் வீடியோவும் சமூகவலைத்தளங்களில் வைரலாகி வருவது குறிப்பிடத்தக்கது.