பயங்கரவாத எதிர்ப்பு நடவடிக்கைகளில் இந்தியா சிறப்பாக செயல்படுவதாக அமெரிக்கா பாராட்டு தெரிவித்துள்ளது.

உலக அளவில் கடந்த ஆண்டில் பயங்கரவாதத்தின் நிலை குறித்த அறிக்கையை அமெரிக்க அரசு வெளியிட்டுள்ளது. உள்நாட்டிலும், சர்வதேச அளவிலும் பயங்கரவாத தடுப்பில் அமெரிக்கா மற்றும் ஒத்த கருத்துடைய நாடுகளுடன் இந்தியா உறுதியுடன் ஒத்துழைப்பதாக அதில் கூறப்பட்டுள்ளது. கடந்த ஆண்டில் காஷ்மீர், வடகிழக்கு மாநிலங்கள் மற்றும் மத்திய மாநிலங்கள் சிலவற்றில் பயங்கரவாத தாக்குதல்களை இந்தியா சந்தித்ததாக அறிக்கையில் தெரிவிக்கப்பட்டுள்ளது. 

பாகிஸ்தானைச் சேர்ந்த பயங்கரவாதிகளின் தாக்குதல் இந்தியாவில் நீடித்ததாக கூறியுள்ள அமெரிக்கா, கடந்த ஆண்டில் உலகம் முழுவதும் நடந்த பயங்கரவாத தாக்குதல்களில் 59 சதவிகிதம் இந்தியா உள்ளிட்ட 5 ஆசிய நாடுகளில் நடந்ததாகவும் தெரிவித்துள்ளது. எனினும், கடந்த ஆண்டில் உலக அளவில் பயங்கரவாத தாக்குதல்கள் 23 சதவிகிதம் குறைந்ததாகவும் அமெரிக்கா தெரிவித்துள்ளது.