மேட்டூர் அணை நிரம்புவதால் முதலமைச்சர் அவசர ஆலோசனை

மேட்டூர் அணை முழு கொள்ளளவான 120 அடியை எட்டும் நிலையில் முதலமைச்சர் பழனிசாமி அவசர ஆலோசனை நடத்தியுள்ளார்.

கர்நாடகாவின் காவிரி நீர் பிடிப்பு பகுதியில் தொடர்ந்து மழை பெய்து வருகிறது. இதனால் கபினி மற்றும் கேஆர்எஸ் அணைகளில் இருந்து காவிரிக்கு 66 ஆயிரம் கனஅடி தண்ணீர் வந்துகொண்டுள்ளது. மேட்டூர் அணைக்கு அதிகப்படியான நீர்வரத்தால் மேட்டூர் அணையின் நீர்மட்டம் பகல் 12 மணி அளவில் அதன் முழு கொள்ளளவான 120 அடியை எட்டும் என அதிகாரிகள் தகவல் தெரிவித்துள்ளனர். 

இதனால் 16 கண் மதகுகளில் திறக்கப்படும் நீரின் அளவு 8,000 கன அடியில் இருந்து 10,000 கன அடியாக உயர்த்தப்படும் என தெரிகிறது. இந்தநிலையில் மேட்டூர் அணை நிரம்பும் நிலையில் முதலமைச்சர் பழனிசாமி அவசர ஆலோசனை நடத்தியுள்ளார். சென்னை தலைமைச் செயலகத்தில் நடைபெற்ற ஆலோசனைக் கூட்டத்தில் அமைச்சர்கள் மற்றும் உயர் அதிகாரிகள் பங்கேற்றனர். மேட்டூர் அணை அதன் முழு கொள்ளளவை எட்டுவதால் பேரிடர் மேலாண்மை குறித்து முதலமைச்சர் ஆலோசனை நடத்தியுள்ளார்.