நீட் தேர்வு தொடர்பாக உச்சநீதிமன்ற உத்தரவை மறு ஆய்வு செய்ய தமிழக அரசு முயற்சி செய்யும் என மக்களவை துணை சபாநாயகர் தம்பிதுரை தெரிவித்துள்ளார்.

கரூரில் இன்று மருத்துவக் கல்லூரி கட்டுமான பணிகள் தொடக்க விழா நடைபெற்றது. அதில், மக்களவை துணை சபாநாயகர் தம்பிதுரை, போக்குவரத்துத்துறை அமைச்சர் எம்.ஆர்.விஜயபாஸ்கர் உள்ளிட்டோர் கலந்து கொண்டு கட்டுமானப் பணிகளை தொடங்கி வைத்தனர். பி‌ன்னர் பேசிய தம்பிதுரை, கரூர் மருத்துவக் கல்லூரி கட்டுமானப் பணிகள் 20 ஏக்கர் பரப்பளவில் சுமார் 250 கோடி ரூபாய் மதிப்பீட்டில் கட்டப்பட உள்ளதாகத் தெரிவித்தார். அடுத்த கல்வி ஆண்டிலேயே மாணவர் சேர்க்கை நடத்த முயற்சிகள் மேற்கொள்ளப்படும் எனவும் கூறினார்.

மேலும் பேசிய அவர், “நீட் தேர்வு தேவையில்லை என்பது தான் ஜெயலலிதாவின் கருத்து. அதிமுகவின் கருத்தும் அதுதான். தமிழகத்தை பொறுத்தவரை நீட் தேர்வு என்பது தேவையில்லாத ஒன்று. உச்சநீதிமன்ற உத்தரவிற்கு கீழ்படிய வேண்டிய நிலை இருக்கிறது. இருப்பினும் உச்சநீதிமன்ற உத்தரவை மறு ஆய்வு செய்ய தமிழக அரசு முயற்சி செய்யும்” என்று கூறினார்.