நகராட்சியாக இருந்த கும்பகோணம் மாநகராட்சியானது: அரசாணை வெளியீடு

கும்பகோணம் நகராட்சி, மாநகராட்சியாக தரம் உயர்த்தப்பட்டதற்கான அரசாணையை தமிழக அரசு வெளியிட்டுள்ளது.

அண்மையில் நடைபெற்ற சட்டப்பேரவையில் நகராட்சி நிர்வாகம், ஊரக வளர்ச்சித்துறை மானிய கோரிக்கையின் மீதான விவாதத்தின் போது, அமைச்சர் கே.என்.நேரு, இதற்கான அறிவிப்பை அறிவித்திருந்தார். அதன்படி, கும்பகோணத்தை மாநகராட்சியாக தரம் உயர்த்துவதற்கான வார்டு எல்லையை வரையறை செய்யப்பட்டதோடு, சாதாரண தேர்தல் நடத்தப்படும் என தமிழக அரசு தெரிவித்துள்ளது. இதேபோன்று,

திருச்செந்தூர், மானாமதுரை, முசிரி, லால்குடி, தாரமங்கலம், இடங்கனசாலை, திட்டக்குடி, வடலூர், கொல்லங்கோடு, பொன்னேரி, திருநின்றவூர், அதிராம்பட்டினம் உள்ளிட்ட 19 பேரூராட்சிகளை நகராட்சிகளாக மாற்றி தமிழக அரசு அரசாணை வெளியிட்டுள்ளது. நாகர்கோவில் மாநகராட்சி எல்லை விரிவாக்கம் செய்யப்பட்டதற்கான அரசாணையையும் தமிழக அரசு வெளியிட்டுள்ளது. கடந்த மார்ச் மாதம் முதல் தரம் உயர்த்தப்பட்டு நாகர்கோவில் மாநகராட்சியாக செயல்பட்டு வரும் நிலையில், விரிவாக்கம் செய்யப்பட்டுள்ளது.