‘விக்’கிற்கு கீழே தங்கம்.. இப்படி ஒரு கடத்தலா ? வசமாக மாட்டிய இளைஞர்..!

தலையில் விக் வைத்துக் கொண்டு அதற்குள் தங்கத்தை கடத்திய நபரை சுங்கத்துறை அதிகாரிகள் கச்சிதமாக கைது செய்தனர்.

கேரள மாநிலம் மலப்புரம் பகுதியை சேர்ந்தவர் நௌஷத். இவர் ஷார்ஷாவில் இருந்து விமானம் மூலம் கொச்சி விமான நிலையம் வந்தடைந்தார். இவரை பார்த்த அதிகாரிகளுக்கு சற்று சந்தேகம் ஏற்பட்டது. பொதுவாக சட்டவிரோதமாக பணத்தையோ தங்கத்தையோ கடத்துபவர்கள் விமான நிலையங்களில் சிக்குவது வழக்கம்தான். கால் பாதத்திலிருந்து மலக்குடல் வரை எங்கு ஒளித்து வைத்து தங்கத்தை கடத்தினாலும் சுங்கத்துறை அதிகாரிகள் கச்சிதமாக கண்டுபிடித்து விடுவார்கள். அப்படித்தான், நௌஷத்தின் கடத்தல் திட்டமும் கச்சிதமாக முறியடிக்கப்பட்டுள்ளது.

தங்கத்தை கடத்த நௌஷத் மற்றவர்களை காட்டிலும் ஒரு வித்தியாசமான முயற்சியை மேற்கொண்டிருக்கிறார். அதாவது தலையின் ஒரு குறிப்பிட்ட பகுதியில் மட்டும் முடியை வழித்திருக்கிறார். பின் அந்த இடத்தில், தான் கடத்த வேண்டிய தங்கத்தை கச்சிதமாக பொருத்தி அதற்குமேல் தலையில் விக் வைத்து விட்டார். இதனை பார்க்க சாதாரணமாகத் தான் தெரிந்திருக்கிறது. பெரிய அளவில் வித்தியாசம் தெரியாத நிலையிலும், விமான நிலையத்தில் இருந்த அதிகாரிகள் நௌஷத்தின் திட்டத்தை கச்சிதமாக முறியடித்து 1.13 கிலோ தங்கத்தை கைப்பற்றியுள்ளனர். மேலும் அவரிடம் விசாரணை நடைபெற்று வருகிறது.