ஜெயலலிதாவுக்கு சிகிச்சைகள் தொடர்வதாக 75 நாட்கள் தெரிவிக்கப்பட்டது பதவி ஆசைக்காகவா என அதிமுக தொண்டர்களும், தமிழக மக்களும் கேள்வி எழுப்புவதாக எதிர்க்கட்சி தலைவர் ஸ்டாலின் தெரிவித்துள்ளார்.

புதிய தலைமுறையில் வெளியான ஜெயலலிதாவின் மருத்துவ அறிக்கை ஆவணத்தை சுட்டிக்காட்டி அடுக்கடுக்கான கேள்விகளை ஸ்டாலின் எழுப்பியுள்ளார். இதுகுறித்து அவர் வெளியிட்டுள்ள அறிக்கையில், இசட் பிளஸ் உயர் பாதுகாப்பு பிரிவில் இருந்த ஜெயலலிதாவின் வாகன வரிசையில் ஆம்புலன்ஸ் இல்லையா?. ஆம்புலன்ஸ் இருந்திருந்தால் அதில் ஜெயலலிதாவை அழைத்துச் செல்லாமல் தனியார் மருத்துவமனையின் ஆம்புலன்ஸில் அழைத்துச் சென்றது ஏன்?. சர்க்கரை அளவு கடுமையாக உயர்ந்து, இதயத்துடிப்பு அதிகரித்து, சுவாசிப்பு வெகுவாக குறைந்து மயக்கமாக ஜெயலலிதா கொண்டு செல்லப்பட்ட நிலையில், வெறுமனே காய்ச்சல் என மருத்துவ அறிக்கை வெளியாக என்ன காரணம்?. யாருடைய நிர்பந்தத்தால் இது நிகழ்ந்தது. அதிதீவிர சிகிச்சை பிரிவில் இருந்த ஜெயலலிதா காவிரிப் பிரச்னை குறித்து அதிகாரிகளுடன் விவாதித்ததாக அரசு அறிக்கை வெளியிட்டது எப்படி?

மருத்துவமனையில் ஜெயலலிதாவைப் பார்க்க யாரும் அனுமதிக்கப்படவில்லை என்ற அமைச்சரின் பேச்சுக்கு ஆளுநர் மாளிகையும் மத்திய அமைச்சர்களும் தரும் பதில் என்ன?. இதுபோன்ற சந்தேகங்களின் பின்னணியில் ஓய்வு பெற்ற நீதிபதியைக் கொண்ட விசாரணை ஆணையத்தால் முழு உண்மையை வெளிக்கொணர முடியாது என்றும், சிபிஐ விசாரணை மூலமே பெருமளவு உண்மைகளை கண்டறிய முடியும். ஜெயலலிதாவுக்கு சிகிச்சைகள் தொடர்வதாக 75 நாட்கள் தெரிவிக்கப்பட்டது பதவி ஆசைக்காகவா என அதிமுக தொண்டர்களும், தமிழக மக்களும் கேள்வி எழுப்புவதாக என ஸ்டாலின் தெரிவித்துள்ளார்.