சமூக வலைத்தளங்களில் டிரெண்டாகும் "ஓரளவுக்குத்தான் பொறுமை"..!

சமூக வலைத்தளங்களில் ‘ஓரளவுக்கு தான் பொறுமை’ என்கிற ஹேஷ்டேக் மிக பிரபலமாகி வருகிறது. இந்த ஹேஷ்டேக் பிரபலமாவதற்கு காரணம் தமிழக அரசியல் களமும் சசிகலாவும்தான் ஆகும்.

தமிழக அரசியல் களம் சூடு கண்டுள்ள இந்த நிலையில் போயஸ் தோட்டத்தில் கட்சியினர் மத்தியில் பேசிய அதிமுக பொதுச் செயலாளர் சசிகலா, ஓரளவுக்குத்தான் பொறுமை.. அதற்கு மேல் அதிமுகவினர் அனைவரும் சேர்ந்து செய்ய வேண்டியதைச் செய்வோம் என கூறியிருந்தார். சசிகலாவின் இந்த பேச்சு மிரட்டுகிற தொனியில் இருப்பதாக கூறி, பன்னீர்செல்வம் தரப்பு அதிமுக எம்.பி மைத்ரேயன் தனது கடும் கண்டனம் தெரிவித்திருந்தார்.

அரசியலானாலும் சரி... இல்லை மற்ற விஷயமானாலும் சரி... இளைஞர்கள் தங்களது கருத்துகளை உடனடியாக சமூக வலைத்தளங்களில் பதிவிட்டு வருகின்றனர். தலைவர்களின் கருத்துகளுக்கும் தங்களது சமூக வலைத்தள பக்கத்திலேயே எதிர்வினையாற்றி விடுகின்றனர். அந்த வகையில் சசிகலா பேசிய ‘ஓரளவுக்கு தான் பொறுமை’ என்கிற வார்த்தை சமூக வலைத்தளங்களில் பிரபலமாகி வருகிறது. #ஓரளவுக்கு_தான்_பொறுமை என்கிற ஹேஷ்டேக்கில் சசிகலாவிற்கு எதிராக பலரும் தங்களது கருத்துகளையும், மீம்ஸ்களையும் பதிவிட்டு வருகின்றனர். மேலும் இந்த மீம்ஸ்-கள் பலராலும் ஷேர் செய்யப்பட்டு வருகிறது. தற்போது ட்விட்டரில் டாப் டிரெண்டாக இருப்பது #ஓரளவுக்கு_தான்_பொறுமை என்ற ஹேஷ்டேக்தான்.