[X] Close
JUST IN
  • BREAKING-NEWS சிபிஐ விசாரணைக் காவலை ரத்துச் செய்யுமாறு உச்ச நீதிமன்றத்தில் ப.சிதம்பரம் மனு. திங்கட்கிழமை வரை சிதம்பரத்தை கைது செய்ய அமலாக்கத் துறைக்கு தடை
  • BREAKING-NEWS கோவையில் 6 பயங்கரவாதிகள் ஊடுருவியுள்ளதாக தகவல் கிடைத்திருக்கிறது என காவல் ஆணையர் பேட்டி. உஷார் நிலையில் காவல்துறை
  • BREAKING-NEWS காஷ்மீருக்கு இன்று சென்று பார்வையிட ராகுல் காந்தி உள்ளிட்ட எதிர்க்கட்சித் தலைவர்கள் திட்டம். கட்டுப்பாடுகளை மீறி வர வேண்டாம் என ஜம்மு காஷ்மீர் அரசு வலியுறுத்தல்
  • BREAKING-NEWS சென்னையில் பெட்ரோல் லிட்டருக்கு ரூ. 74.70 காசுகளாகவும், டீசல் லிட்டருக்கு ரூ. 68.84 காசுகளாகவும் விலை நிர்ணயம்
  • BREAKING-NEWS போலீசாரின் முழுக் கட்டுப்பாட்டிற்குள் வந்த சென்னை விமான நிலையம்

ஐபிஎல் வரலாற்றின் 10 ஜாம்பவான்கள் : மறக்கமுடியுமா ?

ipl-history-top-10-players-ipl-best-batsman-for-ever

2019ஆம் ஆண்டு ஐபிஎல் தொடர் இறுதிக் கட்டத்தை நெருங்கியுள்ள நிலையில், ஐபிஎல் வரலாற்றில் மறக்கமுடியாத 10 பேட்ஸ்மேன்களை நினைவு படுத்துவோம்.

இந்தியா கிரிக்கெட் ரசிகர்களை ஆண்டுதோறும் உற்சாகப்படுத்தும் ஒரு திருவிழாவாக நடைபெறும் ஐபிஎல் டி20 கிரிக்கெட் தொடர் கடந்த 2008ஆம் ஆண்டு முதல் நடத்தப்பட்டு வருகிறது. 13 ஆண்டுகளாக நடைபெற்று வரும் இந்த ஐபிஎல் தொடர், பல சிறந்த ஆளுமைகளை கடந்து வந்துள்ளது. 

ஒரு காலத்தில் சர்வதேச கிரிக்கெட் அரங்குகளை அதிர வைத்த கிரிக்கெட் ஜாம்பவான்கள் பலரும் ஐபிஎல் தொடரிலும் ஆரம்ப காலத்தில் விளையாடினர். அவர்கள் இன்று ஐபிஎல் தொடரில் விளையாடவில்லை என்றாலும், என்றும் மறக்கமுடியாத அளவிற்கு தங்கள் தடங்களை பதித்துவிட்டு சென்றுள்ளனர். அவர்களில் குறிப்பிடத்தகுந்த 10 வீரர்களை காண்போம்.

1.சச்சின் டெண்டுல்கர்

மும்பை இந்தியன்ஸ் அணியின் கேப்டனாக ஐபிஎல் தொடரில் கால்பதித்தார் சச்சின். 78 போட்டிகளில் விளையாடியுள்ள இவர் மொத்தம் 2334 ரன்களை குவித்துள்ளார். 13 அரை சதங்களை விளாசியுள்ள சச்சின், 2011ஆம் ஆண்டு கொச்சி அணிக்கு எதிராக 66 பந்துகளில் அடித்த சதம் இன்றும் அவரது பெயரை சொல்லும். ஐபிஎல் தொடரில் அவரது ஸ்ட்ரைக் ரேட் 119.82 ஆக உள்ளது.  295 பவுண்டரிகள் மற்றும் 29 சிக்ஸர்களை சச்சின் ஐபிஎல்லில் அடித்துள்ளார்.

2. ஆடம் கில்கிறிஸ்ட்

ஆஸ்திரேலியாவின் ஜாம்பவானாக திகழ்ந்த கில்கிறிஸ் டெக்கான் சார்ஜர்ஸ் ஹைதராபாத் அணியில் கீப்பராக அறிமுகமானார். அத்துடன் முதல் மூன்று தொடர்களில் அவர் கேப்டனாகவும் இருந்தார். 80 போட்டிகளில் விளையாடிய இவர் 2069 ரன்களை சேர்த்துள்ளார். 11 அரை சதங்கள் மற்றும் இரண்டு சதங்களை இவர் அடித்துள்ளார். 2008ஆம் ஆண்டு மும்பைக்கு எதிராக 42 பந்துகளில் இவர் அடித்த சதம் ரசிகர்களை ஆச்சர்யப்பட வைத்தது. 239 பவுண்டரிகளை ஐபிஎல் தொடரில் விளாசியுள்ள இவர், 92 சிக்ஸர்களை பறக்கவிட்டுள்ளார். 2009ஆம் ஆண்டு இவர் தலைமையில் டெக்கன் சார்ஜர்ஸ் அணி ஐபிஎல் கோப்பையை வென்றது. 

3. வீரேந்திர சேவாக் 

அதிரடி ஆட்டத்திற்கு பேர் போன சேவாக், டெல்லி டேர்டேவில்ஸ் அணியின் கேப்டனாக ஐபிஎல் தொடரில் வலம் வந்தார். ஐபிஎல் தொடரிலும் தனது அதிரடியை வெளிப்படுத்த தவறவில்லை அவர். 104 ஐபிஎல் போட்டிகளில் விளையாடிய சேவாக் 2728 ரன்களை குவித்துள்ளார். 2 சதங்கள் மற்றும் 16 அரை சதங்கள் அடித்துள்ளார். 334 பவுண்டரிகளை ஓடவிட்ட சேவாக், 106 சிக்ஸர்கள் அடித்து ரசிகர்களுக்கு வானவேடிக்கை காண்பிடித்துள்ளார். 2011ஆம் ஆண்டு டெக்கான் சார்ஜர்ஸ் அணிக்கு எதிராக 56 பந்துகளில் சேவாக் அடித்த 119 ரன்கள் இன்றும் அவரது அதிரடியை நினைவுபடுத்திக்கொண்டிருக்கிறது.

4. மேத்திவ் ஹைடன்

ஐபிஎல் வரலாற்றில் சென்னையின் அதிரடி மன்னன் என்று சொன்னால் உடனே நினைவுக்கு வருவது ஆஸ்திரேலிய வீரர் மேத்திவ் ஹைடன் தான். 32 ஐபிஎல் போட்டிகளில் மட்டுமே விளையாடிய ஹைடன் 1,107 ரன்களை குவித்துள்ளார். மங்கூஸ் எனப் பெயர்கொண்ட சிறிய பேட்டின் மூலம் அடித்த அதிரடி ஐபிஎல் அரங்கத்தையே அதிர வைத்தது. அவர் இருக்கும் வரை சென்னை அணி பேட்டிங்கில் பெரும் பலத்துடன் இருந்தது. 2010ஆம் ஆண்டு டெல்லி அணிக்கு எதிராக 43 பந்துகளில் 93 ரன்களை விளாசிய ஹைடன், சென்னையை வெற்றி பெற செய்தார். சதம் எதுவும் அடிக்கவில்லை என்றாலும், 8 அரை சதங்கள், 121 பவுண்டரிகள் மற்றும் 44 சிக்ஸர்கள் அவர் அடித்துள்ளார்.

5. சவுரவ் கங்குலி

கொல்கத்தா இளவரசன் என ரசிகர்களால் செல்லமாக அழைக்கப்படும் கங்குலி, ஐபிஎல் போட்டியிலும் கொல்கத்தா நைட் ரைடர்ஸ் அணியில்தான் அறிமுகம் ஆனார். கேப்டனாக பொறுப்பேற்ற அவர், தனது பாணியில் பேட்டிங்கையும் வெளிப்படுத்தினார். 59 ஐபில் போட்டிகளில் விளையாடிய அவர், 1349 ரன்களை குவித்துவிட்டு சென்றுள்ளார். 137 பவுண்டரிகள் மற்றும் 42 சிக்ஸர்களை அடித்துள்ளார். ஐபிஎல் தொடரில் அவரது ஸ்ட்ரைக் ரேட் 106.81 ஆக உள்ளது. 2008ஆம் ஆண்டு டெக்கான் சார்ஜர்ஸ் அணிக்கு எதிராக 57 பந்துகளில் கங்குலி அடித்த 97 ரன்கள் அவரது பேட்டிங் திறன் தனித்துவம் வாய்ந்தது என்பதை ஐபிஎல் வரலாற்றில் பதியவைத்துள்ளது.

6. மைக்கெல் ஹஸ்ஸி

சென்னை அணியின் பேட்டிங்கில் முக்கிய பங்கு வகித்த வீரர்களை புரட்டிப்பார்த்தால் மைக்கெல் ஹஸ்ஸி என்ற பெயரை தவிர்த்துவிட்டு நம்மால் செல்ல முடியாது. 59 ஐபில் போட்டிகளில் விளையாடிய ஹஸ்ஸி 1977 ரன்களை குவித்துள்ளார். ஒரு சதம் மற்றும் 15 அரை சதங்களை அடித்துள்ளார். சென்னை இரண்டு முறை ஐபிஎல் கோப்பை வென்றதற்கு முக்கிய காரணமான வீரர்களில் ஒருவராக ஹஸ்ஸியும் உள்ளார். 2008ஆம் ஆண்டு பஞ்சாப் அணிக்கு எதிராக ஹஸ்ஸி 50 பந்துகளில் அடித்த சதம் அவர் அதிரடிகளில் சிறந்த ஒன்றாக திகழ்கிறது.

7. பிரண்டன் மெக்கல்லம்

2008ஆம் ஆண்டு ஐபிஎல் தொடங்கியபோது முதல் போட்டியிலேயே தான் யார் என்பதை காட்டியவர் மெக்கல்லம். கொல்கத்தா அணியில் விளையாடிய அவர், பெங்களூர் அணிக்கு எதிராக 73 பந்துகளில் 158 ரன்களை அடித்தார். அதைக் கண்ட ரசிகர்கள் அனைவருமே 20 ஓவர்கள் போட்டியில் இப்படி ஒரு அதிரடியை வெளிப்படுத்த முடியுமா என ஆச்சர்யப்பட்டு போனார்கள். 109 ஐபிஎல் போட்டிகளில் விளையாடியுள்ள இவர், 2880 ரன்கள் அடித்துள்ளார். 2 முறை சதம் மற்றும் 13 முறை அரை சதங்களை விளாசியுள்ளார். அதுமட்டுமின்றி 293 பவுண்டரிகள் மற்றும் 130 சிக்ஸர்களை அடித்துத்தள்ளியுள்ளார்.

8. ஜாக்யூஸ் கல்லீஸ்

ஐபிஎல் தொடரில் சிறந்த பேட்ஸ்மேன்களில் ஒருவராக மட்டுமின்றி, சிறந்த ஆல்ரவுண்டராகவும் இருந்தவர் ஜாக் கல்லீஸ். தமது அணிக்கு சிறந்த ஆல்ரவுண்டர் வேண்டும் என நினைத்த கங்குலி, முதலில் தேர்ந்தெடுத்த வீரர் கல்லீஸ் தான். 98 ஐபிஎல் போட்டிகளில் விளையாடியுள்ள கல்லீஸ், 2427 ரன்களை சேர்த்துள்ளார். 17 அரை சதங்களை எடுத்துள்ளார். 44 சிக்ஸர்கள் மற்றும் 255 பவுண்டரிகளை அடித்துள்ளார். பவுலிங்கில் 89 போட்டிகளில் பந்துவீசிய இவர், 65 விக்கெட்டுகளை சாய்த்துள்ளார். 

9. குமார் சங்கக்காரா 

இலங்கையின் அணியின் சிறந்த வீரர்களில் ஒருவரான குமார் சங்கக்காரா, சர்வதேச போட்டிகளில் மட்டுமின்றி ஐபிஎல் தொடரிலும் தனது திறமையை வெளிப்படுத்திவிட்டுச் சென்றுள்ளார். டெக்கான் சார்ஜர்ஸ், கிங்ஸ் லெவன் பஞ்சாப் மற்றும் சன்ரைசர்ஸ் ஹைதராபாத் ஆகிய அணிகளுக்காக ஐபிஎல் தொடரில் விளையாடியுள்ளார். இதில் ஹைதராபாத் அணிக்கு கேப்டனாக இருந்தார். 71 ஐபிஎல் போட்டிகளில் விளையாடியுள்ள சங்கக்காரா 1687 ரன்களை அடித்துள்ளார். இதில் 10 அரை சதங்களும் அடங்கும். 195 பவுண்டரிகள் மற்றும் 27 சிக்ஸர்களை அவர் பதிவு செய்துள்ளார். 

10. சனாத் ஜெயசூர்யா

மும்பை இந்தியன்ஸ் அணியில் சச்சின் என்ற சாம்பவான் இருந்தார் என்றால், அதே காலத்தில் விளையாடிய மற்றொரு ஜாம்பவனாக இருந்தவர் ஜெயசூர்யா. சர்வதேச போட்டிகளில் தலைசிறந்த பேட்ஸ்மேன்களை பட்டியலிடும் போது சச்சின், லாரா வரிசையில் ஜெயசூர்யாவும் இடம்பிடித்துவிடுவார். ஐபிஎல் தொடரில் 30 போட்டிகளில் மட்டுமே விளையாடிய ஜெயசூர்யா, 768 ரன்களை குவித்துள்ளார். 1 சதம் மற்றும் 4 அரை சதங்களை அடித்துள்ளார். 2008ஆம் ஆண்டு சென்னை அணிக்கு எதிரான போட்டியில் 48 பந்துகளில் 114 ரன்களை விளாசிய அவரது ஆட்டத்தை ரசிகர்கள் இன்றும் மறந்திருக்க மாட்டார்கள்.

Advertisement:
இது தொடர்பான செய்திகள் :
Advertisement:
Advertisement:
[X] Close