ஸ்டாலின் அடிக்கடி வெளிநாடு செல்லும் மர்மம் என்ன? - முதல்வர் பழனிசாமி தாக்கு 

முதலீடுகளை ஈர்க்கவே வெளிநாடு செல்வதாக முதலமைச்சர் எடப்பாடி பழனிசாமி தெரிவித்துள்ளார். 

இங்கிலாந்து, அமெரிக்கா, மற்றும் துபாய் ஆகிய நாடுகளுக்கு சுற்றுப்பயணம் செல்வதற்காக இன்று காலை சென்னை விமான நிலையத்திற்கு முதலமைச்சர் எடப்பாடி பழனிசாமி வந்தார். 

அப்போது பேசிய அவர், “தொழில் முதலீடுகளை ஈர்க்கவும் நவீன தொழில்நுட்பங்களை அறிந்து கொண்டு அதை செயல்படுத்தவும் வெளிநாடுகளுக்கு செல்கிறேன். நான் தொழிலதிபர் இல்லை. விவசாயி. முதலீட்டாளர்கள் அழைத்ததாலேயே வெளிநாடு செல்கிறேன். ஸ்டாலின் அடிக்கடி வெளிநாடு செல்லும் மர்மம் என்ன? அப்போது நீங்கள் எந்தக் கேள்வியும் கேட்கவில்லை. சொந்த விஷயத்திற்காக அவர் வெளிநாடு செல்வதாக சொல்கிறார். அந்தச் சொந்த விஷயம் என்ன? அதை அவர் தெளிவுபடுத்தவில்லை. ஆனால் நான் வெளிநாடு செல்வதை ஸ்டாலின் கொச்சைப்படுத்தி பேசுகிறார்” எனத் தெரிவித்தார்.  

இன்று காலை சென்னையில் இருந்து புறப்படும் முதலமைச்சர் முதலில் லண்டன் செல்கிறார். செப்.2 ஆம் தேதி நியூயார்க் சென்று அமெரிக்கவாழ் தமிழ் மக்களிடம் கலந்துரையாடுகிறார். செப். 8, 9 தேதிகளில் துபாய் தொழில் முனைவோர் ஆலோசனை கூட்டத்தில் சிறப்பு விருந்தினராக பங்கேற்கிறார்.