முடி வெட்டுவதை தடுத்ததால் கத்தியால் கையை வெட்டிய கொடூரம்

நீலகிரி மாவட்டம் குன்னூரில் நண்பனின் தலைமுடியை வெட்டுவதை தடுத்த பள்ளி மாணவர் கத்தியால் வெட்டப்பட்ட சம்பவம் பரபரப்பை ஏற்படுத்தியுள்ளது.

நீலகிரி மாவட்டம் குன்னூர் அருகே உள்ள சேலாஸ் சின்னகரும்பாலம் பகுதியைச் சேர்ந்த சங்ரித், தனியார் பள்ளி ஒன்றில் ஒன்பதாம் வகுப்பு பயின்று வருகிறார். மாலையில் பள்ளி முடிந்து பேருந்து நிறுத்தத்தில் சங்ரித் மற்றும் அவரது நண்பர்கள் நின்றிருந்ததாக தெரிகிறது. அப்போது, சங்ரித் நண்பர்களின் தலைமுடியை இறைச்சிக்கடையில் வேலை செய்யும் 16 வயது சிறுவன் வெட்ட முயன்றதாக தெரிகிறது. இதனை சங்ரித் தடுக்கவே அவருக்கும் அச்சிறுவனுக்கும் இடையே ஏற்பட்ட வாக்குவாதம் முற்றி தள்ளுமுள்ளாக மாறியுள்ளது. 

அப்போது தான் மறைத்து வைத்திருந்த கத்தியால் சங்ரித்தின் வலதுகையை அச்சிறுவன் வெட்டியதாக தெரிகிறது. இதில் படுகாயமடைந்த சங்கிரித்தை பொதுமக்கள் மீட்டு மருத்துவமனையில் அனுமதித்துள்ளனர். மாணவரை தாக்கிய சிறுவன் கைது செய்யப்பட்டு சிறுவர் சீர்த்திருத்தப் பள்ளியில் அடைக்கப்பட்டார்.