தமிழக மீனவர்கள் மீது இலங்கை கடற்படை கல்வீச்சு

கச்சத்தீவு அருகே மீன்பிடித்த தமிழக மீனவர்கள் மீது இலங்கை கடற்படையினர் கல்வீசித்தாக்குதல் நடத்தியுள்ளனர். 

ராமேஸ்வரம் மண்டபம் பகுதியைச் சேர்ந்த மீனவர்கள் கச்சத்தீவு அருகே மீன்பிடித்துக்கொண்டிருந்தனர். அப்போது அப்பகுதிக்கு வந்த இலங்கை கடற்படையினர் கல்வீசித்தாக்குதல் நடத்தியுள்ளனர்.இதில், ராமேஸ்வரம், மண்டபம் பகுதியைச் சேர்ந்த 50க்கும் அதிகமான படகுகள் சேதமடைந்துள்ளதாக கூறப்படுகிறது.30 லட்சம் மதிப்பிலான மீன்பிடி சாதனங்கள் சேதமடைந்துள்ளதாக பாதிக்கப்பட்ட மீனவர்கள் வேதனையுடன் கூறுகின்றனர். இலங்கை கடற்படையினரின் இந்த தாக்குதலால் நூற்றுக்கும் அதிகமான படகுகளைச் சேர்ந்த மீனவர்கள் மீன்பிடிக்காமல் அச்சத்துடன் கரைத்திரும்பினர். தமிழக மீனவர்களை கைது செய்வது, படகுகளை தாக்குவது என இலங்கை கடற்படையினர் மீன்பிடிக்க விடாமல் தொடர்ந்து அச்சுறுத்துவதாக மீனவர்களின் உறவினர்கள் குற்றஞ்சாட்டியுள்ளனர்.