ஏலச்சீட்டு நடத்தி ரூ.1.5 கோடி மோசடி செய்த பெண்

திருவள்ளூரில் ஏலச்சீட்டு நடத்தி ரூ.1.5 கோடி ரூபாய் மோசடி செய்த பெண் மீது நடவடிக்கை எடுக்ககோரி பாதிக்கப்பட்டவர்கள் மாவட்ட கண்காணிப்பாளரிடம் புகார் மனு அளித்தனர்.

திருவள்ளூர் ராஜாஜிபுரம் பகுதியில் வசித்து வந்த சித்ரா என்பவர் அதே பகுதியில் பியூட்டி பார்லர் நடத்தி வந்துள்ளார். இவர் அங்குள்ளவர்களிடம் 1 கோடி ரூபாய் ஏலச்சீட்டு நடத்தியும், தமது மகளுக்கு திருமணம் வைத்திருப்பதாக கூறி தம்மிடம் சீட்டு போட்டவர்களிடமே கைமாற்றாக ரூபாய் 50 லட்சத்திற்கு மேல் வாங்கியும் உள்ளாதாக கூறப்படுகிறது. தன்னிடம் சீட்டு போட்டவர்களுக்கு சீட்டு பணமும் தரவில்லை கடனாக மகள் திருமணத்திற்கு வாங்கிய பணத்தையும் தரவில்லை எனவும் முன்னாள் பூந்தமல்லி அதிமுக சட்டமன்ற உறுப்பினர் மணிமாறனுடன் பணத்தை இழந்தவர்கள் மாவட்ட காவல் கண்காணிப்பாளர் சிபி சக்ரவர்த்தியிடம் புகார் அளித்தனர். புகாரை பெற்றுக்கொண்ட மாவட்ட காவல் கண்காணிப்பாளர் விசாரணை செய்து தக்க நடவடிக்கை எடுக்கப்படும் என தெரிவித்துள்ளார்.

இதேபோல காக்களூரில் தீபாவளி பரிசு சீட்டு நடத்தி ரூபாய் 20 லட்சம் மோசடி செய்ததாக வேல்பாண்டி என்பவர் மீதும் பாதிக்கப்பட்வர்கள் மாவட்ட எஸ்பியிடம் புகார் அளித்துள்ளனர்.