IND vs SA: 49 ரன்களுக்குள் 7 விக்கெட்; 327 ரன்களுக்கு சுருண்ட இந்திய அணி

இந்திய கிரிக்கெட் அணி தென் ஆப்பிரிக்க அணிக்கு எதிரான செஞ்சூரியன் டெஸ்ட் போட்டியின் முதல் இன்னிங்ஸில் 327 ரன்களுக்கு ஆல் அவுட்டாகி உள்ளது.

முதல் நாள் ஆட்ட நேர முடிவில் இந்திய அணி 3 விக்கெட்டுகள் இழப்பிற்கு 272 ரன்களை எடுத்திருந்தது. இரண்டாம் நாள் ஆட்டம் முழுவதும் மழையினால் கைவிடப்பட்டது. இன்று தொடங்கிய மூன்றாம் நாள் ஆட்டத்தின் முதல் 15.3 ஓவர்களில் 49 ரன்கள் சேர்ப்பதற்குள் 7 விக்கெட்டுகளை இழந்துள்ளது இந்திய அணி.

இந்திய அணிக்காக அதிகபட்சமாக கே.எல்.ராகுல் 123 ரன்களை சேர்த்திருந்தார். மயங்க் அகர்வால் 60 ரன்களும், ரஹானே 48 ரன்களும் சேர்த்திருந்தனர். இந்திய அணியின் ஆறு பேட்ஸ்மேன்கள் ஒற்றை இலக்க ரன்களில் அவுட்டாகி இருந்தனர்.

முதல் இன்னிங்ஸில் தென் ஆப்பிரிக்க அணியின் வேகப்பந்து வீச்சாளர் இங்கிடி 24 ஓவர்கள் வீசி 71 ரன்களை விட்டுக்கொடுத்து 6 விக்கெட்டுகளை கைப்பற்றியுள்ளார். தென் ஆப்பிரிக்க அணி தற்போது முதல் இன்னிங்ஸில் பேட்டிங் செய்து வருகிறது.