“ஜோ பைடன் நிர்வாகத்திற்கு அதிர்ஷ்டம் துணைநிற்கட்டும்”- டொனால்ட் ட்ரம்ப்

தனது முயற்சியால் உலக நாடுகள் அமெரிக்காவை மீண்டும் மதிக்கத் தொடங்கியிருப்பதாக அமெரிக்க அதிபர் டொனால்ட் ட்ரம்ப் தெரிவித்துள்ளார்.

அவரது பதவிக்காலம் இன்றுடன் முடிவதையொட்டி நாட்டுமக்களிடம் விடைபெறும் வகையில் காணொலி மூலம் உரையாற்றிய ட்ரம்ப் கடந்த நான்கு ஆண்டுகளில் நாட்டை புத்தாக்கம் செய்ய பல்வேறு நடவடிக்கைகளை எடுத்ததாக கூறியுள்ளார். அமெரிக்காவை மீண்டும் மகத்தான நாடாக மாற்றும் குறிக்கோளுடன் செயல்பட்டதாகவும், அனைவரும் இணைந்து இலக்கை அடைந்திருப்பது பெருமிதமளிப்பதாகவும் அவர் குறிப்பிட்டுள்ளார்.

புதிதாக பதவியேற்கவுள்ள நிர்வாகத்திற்கு வாழ்த்து தெரிவித்துள்ள ட்ரம்ப், அவர்களுக்கு அதிர்ஷ்டம் துணை நிற்கட்டும் என்றும் தெரிவித்தார். அமெரிக்க நாடாளுமன்றத்தின் மீதான தாக்குதல் அனைவருக்கும் அதிர்ச்சி அளித்ததாக கூறிய ட்ரம்ப், அரசியல் வன்முறை அமெரிக்கர்கள் மதிக்கும் அனைத்திற்கும் எதிரானது என்றும் அதனை ஏற்றுக்கொள்ள முடியாது என்றும் தெரிவித்தார்.

கொரோனா தொற்றுக்கு மிகக் குறைந்த காலத்தில் தடுப்பூசி கண்டுபிடிக்கப்பட்டதாக பெருமிதம் தெரிவித்த ட்ரம்ப், வேறொரு நிர்வாகமாக இருந்திருதால் தடுப்பு மருந்து கண்டுபிடிக்க 10 வருடம் கூட எடுத்திருக்கலாம் என குறிப்பிட்டார்.