மதுபோதையில் இருந்த மகனால் தாய்க்கு நேர்ந்த கொடூரம் - திண்டுக்கல்லில் சோகம்

திண்டுக்கல் அருகே உள்ள ரெட்டியார் சத்திரத்தில் பெற்ற தாயை அடித்துக் கொன்ற மகன் கைது செய்யப்பட்டார்.

திண்டுக்கல் மாவட்டம் ரெட்டியார்சத்திரம் அருகே உள்ள தோப்புப்பட்டியைச் சேர்ந்தவர் முத்தம்மாள் (71). தனியாக வசித்து வரும் இவருடைய மகன் ரத்தினவேல். இவர் அதே ஊரில் தனது மனைவி மற்றும் குழந்தையுடன் தனியாக வசித்து வருகிறார்.

இந்நிலையில் தாய்க்கும் மகனுக்கும் இடையே பல வருடங்களாக குடும்ப தகராறு இருந்து வருகிறது. இதனால் அடிக்கடி தனது தாயுடன் ரத்தினவேல் தகராறில் ஈடுபடுட்டுள்ளார். இந்நிலையில் இன்று மதுபோதையில் இருந்த ரத்தினவேல் தனது தாயுடன் தகராறில் ஈடுபட்டுள்ளார்.

அப்போது தனது தாய் முத்தமாளை கீழே தள்ளி தாக்கியுள்ளார். இதில் பேச்சு மூச்சு இல்லாமல் கிடந்த முத்தமாளை உடனடியாக 108 ஆம்புலன்ஸ் மூலம் திண்டுக்கல் அரசு மருத்துவமனைக்கு கொண்டு சென்றனர். ஆனால், வரும் வழியிலேயே பரிதாபமாக உயிரிழந்தார். இது தொடர்பாக ரெட்டியார்சத்திரம் போலீசார் வழக்குப்பதிவு செய்து ரத்தினவேலை கைது செய்தனர். மதுபோதையில் பெற்ற தாயை கொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.