திருச்சி சிவா மகன் மீது போலீஸ் வழக்குப்பதிவு.!

சென்னையில் உள்ள நட்சத்திர ஓட்டலில் மதுபோதையில் தகராறு செய்ததாக திமுக எம்.பி. திருச்சி சிவாவின் மகன் மீது காவல்துறையினர் வழக்குப்பதிவு செய்தனர்.

கோடம்பாக்கத்தில் வசிக்கும் ஸ்ரீராம் என்பவர் நட்சத்திர ஓட்டலில் மதுகுடித்துவிட்டு வெளியே வந்துள்ளார். அப்போது, அங்கு மதுபோதையில் இருந்த திருச்சி சிவாவின் மகன் சூர்யா, ஸ்ரீராமை பார்த்து மது வாங்கி வரும்படி தகராறு செய்து அடிக்க முயன்றதாக கூறப்படுகிறது. இதனால் அதிர்ச்சி அடைந்த அவர், சூர்யா மீது நடவடிக்கை எடுக்குமாறு காவல்நிலையத்தில் புகார் அளித்தார்.

இதே போன்று, திருச்சி சிவாவின் மகன் சூர்யாவும் புகார் கொடுத்துள்ளார். அதில், பிறந்த நாள் விழா ஒன்றில் கலந்து கொண்டபோது, தனது நண்பரின் கையில் இருந்த மதுபாட்டிலை ஸ்ரீராம் பிடுங்கியதாகவும், அதை தட்டிக் கேட்டதும் கத்தியை கொண்டு தன்னை மிரட்டியதாகவும் சூர்யா தெரிவித்துள்ளார்.

இரண்டு புகார்களையும் பெற்றுக் கொண்ட தேனாம்பேட்டை காவல்துறையினர் தனித்தனியே வழக்குப்பதிவு செய்துள்ளனர். புகாருக்கு ஆளான சூர்யா, திமுக எம்.பி. திருச்சி சிவாவை விட்டு பிரிந்து வாழ்கிறார் என்பது குறிப்பிடத்தக்கது.