வீரரின் கன்னத்தில் அறைந்த பங்களாதேஷ் பந்துவீச்சாளர் சஸ்பெண்ட்!

சக வீரரை அடித்த பங்களாதேஷ் பந்து வீச்சாளர் ஷகாதத் ஹூசைன் சஸ்பெண்ட் செய்யப்பட்டுள்ளார்.

பங்களாதேஷ் கிரிக்கெட் அணியின் முன்னாள் வேகப்பந்துவீச்சாளர் ஷகாதத் ஹூசைன். இவர் அந்த அணிக்காக, 38 டெஸ்ட், 51 ஒருநாள் மற்றும் 6 டி-20 போட்டிகளில் விளையாடி இருக்கிறார். இப்போது தேசிய கிரிக்கெட் லீக் போட்டியில் விளையாடி வந்தார். டாக்கா -குல்னா டிவிஷன் அணிகள் இடையிலான போட்டி குல்னாவில் நடந்து வருகிறது. 

இதில் டாக்காவுக்காக ஆடும் ஷகாதத், தனது பந்துவீச்சு குறித்து விமர்சித்த சக வீரர் அராபத் சன்னியை நேற்று முன் தினம் தாக்கியதாகக் கூறப்படுகிறது. இந்த சம்பவம் குறித்து புகார் வந்ததை அடுத்து, பங்களாதேஷ் கிரிக்கெட் வாரியம் ஷகாதத்தை உடனடியாக சஸ்பெண்ட் செய்தது. இதனால் போட்டியின் பாதியிலேயே அவர் திருப்பி அனுப்பப்பட்டார்.

ஷகாதத் ஹூசைனுக்கு ஒரு ஆண்டு தடை மற்றும் அபராதம் விதிக்கப்பட வாய்ப்பு இருப்பதாக கூறப்படுகிறது.