அதிமுக, அமமுகவினர் இடையே மோதல் - நெல்லை பரபரப்பு

நெல்லை பாளையங்கோட்டையில் அதிமுக, அமமுகவினர் இடையே ஏற்பட்ட மோதலில் இருவர் படுகாயமடைந்தனர்.

நெல்லை மாவட்டம் பாளையங்கோட்டை தெற்கு பஜாரில் சுதந்திரப் போராட்ட வீரர் அழகு முத்துக்கோனின் 262-ஆவது பிறந்தநாள் விழா மற்றும் குருபூஜை நடைபெற்றது. பல சமுதாய அமைப்புகள், அரசியல் கட்சியினர் அழகு முத்துக்கோனின் திருவுருவச் சிலைக்கு மரியாதை செலுத்தி வந்தனர். 

இந்தநிலையில், அதிமுகவினர் மரியாதை செலுத்த வந்த போது, அங்கு அமமுகவினரும் குவிந்தனர். சிலைக்கு அமமுகவினர் முதலில் மாலை அணிவித்ததால், அதிமுகவினர் வாக்குவாதத்தில் ஈடுபட்டனர்.

அது தொடர்பாக செய்தி சேகரித்து கொண்டிருந்த தனியார் தொலைக்காட்சி செய்தியாளர் மீது அதிமுகவினர் தாக்குதல் நடத்தினர். அதனால் இருதரப்பினரும் ஒருவரை, ஒருவர் கடுமையாக தாக்கி கொண்டனர். அதில், இருவருக்கு தலையில் காயம் ஏற்பட்டது. அவர்கள் இருவரும் பாளையங்கோட்டை அரசு மருத்துவமனையில் அனுமதிக்கப்பட்டுள்ளனர். தொடர்ந்து அந்தப் பகுதியில் அசாதாரண சூழல் நிலவுவதால் காவல்துறையினர் குவிக்கப்பட்டுள்ளனர்.