கார் விபத்து: நடிகர் ராணா தந்தை மீது வழக்கு!

நடிகர் ராணாவின் அப்பாவும் பிரபல தயாரிப்பாளருமான சுரேஷ் பாபு ஓட்டிச் சென்ற கார் விபத்துக்குள்ளானதில் 3 பேர் படுகாயமடைந்தனர்.

பிரபல தெலுங்கு தயாரிப்பாளர் சுரேஷ் பாபு. இவர் பிரபல தயாரிப்பாளர் டி.ராமநாயுடுவின் மகன். தெலுங்கு ஹீரோ வெங்கடேஷின் அண்ணன். சுரேஷ் புரொடக்‌ஷன்ஸ் என்ற பெயரில் பல்வேறு ஹிட் படங்களை தயாரித்துள்ள இவரது மகன் ’பாகுபாலி’ ராணா.

சுரேஷ் பாபு, தனது சொகுசு காரில் ஐதராபாத்தில் உள்ள தனது வீட்டுக்குத் திரும்பி கொண்டிருந்தார். அப்போது கர்கானா என்ற பகுதியில் உள்ள இம்பீரியல் கார்டன் அருகே வந்தபோது, டூவீலர் ஒன்றின் மீது கார் மோதியது. இதில், டூவீலரில் சென்றுகொண்டிருந்த சதீஷ் சந்திரா (35), நீலம் துர்காதேவி (30), அவர்கள் குழந்தை சித்திஷ் (3) ஆகியோர் படுகாயமடைந்தனர்.

இதையடுத்து உடனடியாக போலீசுக்கும் ஆம்புலன்ஸூக்கும் தகவல் தெரிவிக்கப்பட்டது. அவர்கள் காயமடைந்தவர்களை மீட்டு அருகில் உள்ள மருத்துவமனைக்கு அனுப்பி வைத்தனர். அவர்களுக்கு தீவிர சிகிச்சை அளிக்கப்பட்டு வருகிறது. 

விபத்து வழக்குப் பதிவு செய்துள்ள போலீசார், தயாரிப்பாளர் சுரேஷ் பாபுவை போலீஸ் விசாரணைக்கு வருமாறு கூறியுள்ளனர்.