முதல்வர் வீடு அருகே பைக் ரேஸ் - 4 பேர் கைது

முதலமைச்சர் இல்லம் அருகே பைக் ரேஸில் ஈடுபட்ட சிறுவன் உள்பட 4 பேரை போலீசார் கைது செய்துள்ளனர்.

சென்னை அடையாறு திருவிக மேம்பாலத்தில் நள்ளிரவில் பைக் ரேஸில் இளைஞர்கள் ஈடுபடுவதை "புதியதலைமுறை" பிரேத்யேக காட்சிகளோடு நேற்று இரவு வெளியிட்டது.

 இதையடுத்து அடையாறு துணை ஆணையர் சஷாங்சாய் தலையிலான போலீசார் அங்குள்ள கண்காணிப்பு கேமரா காட்சிகள் உள்பட பல்வேறு தகவல்களை வைத்து தீவிரமாக தேடினர். இந்நிலையில், சிறுவன் உள்பட 4 பேரை அடையாறு போலீசார் கைது செய்துள்ளனர். 

புளியந்தோப்பைச் சேர்ந்த ஹலில் பாஷா (19), அதே பகுதியில் துணிக்கடையில் வேலை செய்து வருகிறார். அப்துல் கரீம் (19) பெரியமேட்டில் லெதர் நிறுவனத்தில் வேலை செய்து வருகிறார். பெரம்பூரைச் சேர்ந்த சல்மான் (23) ஏசி மெக்கானிக். பெரம்பூரைச் சேர்ந்த 17 வயது சிறுவன் ஆகியோரை அடையாறு போலீசார் வழக்குப்பதிவு செய்து கைது செய்துள்ளனர். 2 பைக்குகளை போலீசார் பறிமுதல் செய்துள்ளனர்.

பைக் ரேஸில் ஈடுபட்டது தொடர்பாக சில இளைஞர்கள் தலைமறைவாக உள்ளனர். அவர்களையும் போலீசார் தேடி வருகின்றனர். சென்னை அடையாறில் உள்ள முதலமைச்சர் இல்லம் அருகே இந்த பைக் ரேஸ் நடைபெற்றதாக சற்று நேரம் அந்த பகுதியில் பரபரப்பு நிலவியது.