ஒகி புயலால் காணாமல்போன மீனவர்களை மீட்பதற்கு, நாடாளுமன்றத்தில் குரல் எழுப்பப்போவதாக காங்கிரஸ் கட்சியின் தலைவர் ராகுல் காந்தி உறுதியளித்துள்ளார்.

விமானம் மூலம் திருவனந்தபுரம் வந்த அவர், அங்கிருந்து ஹெலிகாப்டரில் கன்னியாகுமரி மாவட்டம் சின்னத்துறை கிராமத்திற்கு வந்தார். அங்கு, மீனவ மக்களை சந்தித்த ராகுல் காந்தி காணாமல்போன மீனவர்களின் விவரம் குறித்து கேட்டறிந்தார். அவருடன் காங்கிரஸ் கட்சியின் மாநில தலைவர் திருநாவுக்கரசர், சட்டப்பேரவை உறுப்பினர்கள் ராமசாமி, விஜயதரணி உள்ளிட்டோரும் உடனிருந்தனர். 

காணாமல்போன மீனவர்களை மீட்க உதவுமாறு ராகுல் காந்தியிடம் மீனவப் பெண்கள், குடும்பத்தினர் மனு அளித்தனர். பின்னர் பேசிய ராகுல் காந்தி, ஒகி புயலால் மீனவர்களும், விவசாயிகளும் பெருந்துயரத்தில் இருப்பதாக குறிப்பிட்டார். மீனவர்களுக்காக தனி அமைச்சகம் அமைக்க காங்கிரஸ் தொடர்ந்து வலியுறுத்தி வருவதாகவும், காணாமல்போன மீனவர்களை மீட்க நாளை தொடங்கும் நாடாளுமன்ற கூட்டத்தில் குரல் எழுப்பப்படும் என்றும், தமிழக அரசிடமும் வலியுறுத்தப்படும் என்றும் தெரிவித்தார்.