95 மக்களவை தொகுதிகளில் சராசரியாக 67.84% வாக்குப்பதிவு

தமிழகம், புதுச்சேரி, கர்நாடக உள்ளிட்ட 11 மாநிலங்களில் உள்ள 95 மக்களவைத் தொகுதிகளில் நடைபெற்ற இரண்டாம் கட்ட வாக்குப்பதிவில் 67.84 சதவிகித வாக்குகள் பதிவானதாக தேர்தல் ஆணையம் தெரிவித்துள்ளது. 

தமிழகத்தில் 38 தொகுதிகள், புதுச்சேரியில் ஒரு தொகுதி மற்றும் மகராஷ்டிராவில் 10 தொகுதிகள், உத்தரப்பிரதேசத்தில் 8 தொகுதிகள், அசாம், பீகார் மற்றும் ஒடிஷாவில் தலா 5 தொகுதிகளுக்கும் வாக்குப்பதிவு நடைபெற்றது. சத்தீஸ்கர் மற்றும் மேற்கு வங்கத்தில் தலா 3 தொகுதிகளிலும், கஷ்மீரில் இரண்டு தொகுதிகளிலும் மணிப்பூரில் ஒரு தொகுதியிலும் தேர்தல் நடைபெற்றது. இது தவிர தமிழகத்தில் காலியாகவுள்ள 18 சட்டப்பேரவைத் தொகுதிகளுக்கான இடைத்தேர்தலும், ஒடிஷாவில் 35 சட்டப்பேரவைத் தொகுதிகளுக்கான தேர்தலும் நேற்று நடைபெற்றன.

இந்நிலையில், 95 மக்களவைத் தொகுதிகளில் நடைபெற்ற இரண்டாம் கட்ட வாக்குப்பதிவில் 67.84 சதவிகித வாக்குகள் பதிவானதாக தேர்தல் ஆணையம் தெரிவித்துள்ளது. 

குறைந்தபட்சமாக காஷ்மீரில் 43.4 சதவிகித வாக்குகளும், அதிகபட்சமாக புதுச்சேரியில் 81 புள்ளி 57 சதவிகித வாக்குகளும் பதிவானதாக தேர்தல் ஆணைய அதிகாரிகள் தெரிவித்தனர். தமிழகம், மேற்கு வங்கம், அஸாம், மனிப்பூர், சத்தீஸ்கர், ஆகிய மாநிலங்கள் 70 சதவிகிதத்திற்கும் மேல் வாக்குப்பதிவை கண்டதாக கூறப்பட்டுள்ளது.