புறாவை துரத்திச்சென்று 100 அடி ஆழக் கிணற்றில் விழுந்த சிறுவன்!

ராசிபுரம் அருகே புறாவை துரத்திச்சென்ற 10-ம் வகுப்பு மாணவன் 100 அடி ஆழக்கிணற்றில் தவறி விழுந்தான்

நாமக்கல் மாவட்டம் ராசிபுரத்தை அடுத்துள்ளது புதுப்பாளையம்.  அப்பகுதியில் வசித்து வரும் கூலித்தொழிலாளியான பெருமாள் என்பவருக்கு கார்த்திக் என்ற மகன் உள்ளார். அதே பகுதியிலுள்ள பள்ளியில் 10 வகுப்பு படித்து வரும் கார்த்திக், நேற்று தனது நண்பர்களுடன் விளையாடியுள்ளார்.  அப்போது அவ்வழியாக பறந்து சென்ற புறாவை துரத்திச் சென்றுள்ளனர். 

புறா மீது கவனம் வைத்து ஓடிய கார்த்திக் எதிரே கிணறு இருந்ததை கவனிக்காமல் 100 அடி ஆழக்கிணற்றில் தவறி விழுந்தார். இதனைக் கண்ட சக நண்பர்கள், வீட்டிற்கும், காவல்துறைக்கும் தகவல் அளித்தனர். உடனடியாக அளிக்கப்பட்ட தகவலின் பேரில் சம்பவ இடத்திற்கு சென்ற தீயணைப்பு துறையினர் கிணற்றுக்குள் சிக்கிய மாணவனை 1 மணி நேரம் போராடி உயிருடன் மீட்டனர். இந்த சம்பவம் தொடர்பாக ராசிபுரம் காவல்துறையினர் வழக்குப்பதிவு செய்து விசாரணை நடத்தி வருகின்றனர்.