இந்தியா - மியான்மர் இடையே சர்வதேச எல்லை திறப்பு

இந்தியா- மியான்மர் நாடுகளுக்கு இடையே சர்வதேச எல்லை திறக்கப்பட்டது. 

இந்தியா மற்றும் மியான்மர் நாடுகளுக்கு இடையே மேற்கொள்ளப்பட்ட புரிந்துணர்வு ஒப்பந்தங்களின் அடிப்படையில், தரை வழியாகச் செல்லும் எல்லை பகுதி திறக்கப்பட்டது. வரலாற்றுச் சிறப்பு மிக்க இந்த நிகழ்வில், மிசோரம் மாநிலத்தில் பொருளாதாரத்துறை அமைச்சர் ரூஹ்லானா மற்றும் மியான்மரின் சின் மாநிலத்தின் முதலமைச்சர் சாலய் லியான் இணைந்து எல்லைப் பகுதியை திறந்துவைத்தனர். 

இருநாட்டு எல்லைப் பகுதியில் அமைந்துள்ள தியாவ் நதியின் குறுக்கே கட்டப்பட்டுள்ள பாலத்தில், இரு நாட்டு தலைவர்களும் கைகுலுக்கிக் கொண்டனர். இந்த நிகழ்வுக்கு முன்னதாக இரு நாட்டு கலாச்சாரத்தை வரவேற்கும் நடன நிகழ்ச்சிகள் நடத்தப்பட்டன. கடந்த ஆண்டு மே மாதம் மியான்மருக்கு சென்ற மத்திய வெளியுறவுத்துறை அமைச்சர் சுஷ்மா சுவராஜ் முன்னிலையில், இரு நாடுகளுக்கு இடையே மேற்கொள்ளப்பட்ட ஒப்பந்தத்தின் அடிப்படையில் தற்போது சர்வதேச எல்லை திறக்கப்பட்டது.