சீமானுக்கு ஜாமின் - உயர்நீதிமன்றம் உத்தரவு

நாம் தமிழர் கட்சியின் ஒருங்கிணைப்பாளர் சீமான் உள்ளிட்ட ஆறு பேரை ஜூன் 4-ம் தேதி வரை கைது செய்ய கூடாது என திருச்சி காவல்துறைக்கு உயர்நீதிமன்றம் மதுரைக்கிளை இடைகாலதடை விதித்து உத்தரவிட்டுள்ளது.

திருச்சி விமான நிலையத்தில் கடந்த 19 ஆம் தேதி மதிமுக - நாம் தமிழர் கட்சி தொண்டர்கள் மோதலில் ஈடுபட்ட விவகாரத்தில் சீமான் உள்ளிட்ட 8 பேர் மீது கொலை மிரட்டல் உள்ளிட்ட 5 பிரிவுகளின் கீழ் வழக்குப்பதிவு செய்யப்பட்டுள்ளது. 

நாம் தமிழர் கட்சியின் ஒருங்கிணைப்பாளர் சீமான் உயர்நீதிமன்றம் மதுரைக்கிளையில் தாக்கல் செய்த மனுவில் 
" கடந்த 19 ஆம் தேதி,திருச்சி விமான நிலையம் வந்த போது தன்னை வரவேற்க வந்த நாம் தமிழர் கட்சியினருக்கும், வைகோவை வரவேற்க வந்த மதிமுக தொண்டர்களுக்கும் இடையே மோதல் ஏற்பட்டது ; அதில் 8 பேர் பலத்த காயமடைந்த நிலையில் இரு தரப்பினரும் பரஸ்பரம், விமான நிலையத்தில் புகாரளித்தனர். சீமான் உள்ளிட்ட 8 பேர் மீது கொலை மிரட்டல் உள்ளிட்ட 5 பிரிவுகளின் கீழ் வழக்குப்பதிவு செய்யப்பட்டுள்ளது. சம்பவம் நடக்கும் போது அந்த பகுதியில் தான் இல்லை என்பதால் கைது செய்வதில் இருந்து முன்ஜாமின் வழங்கி உத்தரவிட வேண்டும் என கூறியுள்ளார்.

இந்த மனு இன்று நீதிபதி கிருஷ்ணவள்ளி முன்பு விசாரணைக்கு வந்தது. அப்போது நாம் தமிழர் கட்சியின் ஒருங்கிணைப்பாளர் சீமான் உள்ளிட்ட ஆறு பேரை ஜூன் 4 ஆம் தேதி வரை கைது செய்ய கூடாது என நீதிபதி திருச்சி காவல்துறைக்கு அறிவுறுத்தினார். மேலும் வழக்கு விசாரணையை  ஜூன் 4 ஆம் தேதிக்கு ஒத்திவைத்தார்