போட்டித் தேர்வர்களுக்காக கல்வித் தொலைக்காட்சியில் தனி அலைவரிசை - அரசாணை வெளியீடு

போட்டித் தேர்வு ஆர்வலர்களுக்காக, தமிழக அரசின் கல்வி தொலைக்காட்சியின் சார்பில் தனி அலைவரிசை ஏற்படுத்துவதற்கான அரசாணை வெளியிடப்பட்டுள்ளது.

பல்வேறு மத்திய, மாநில அரசு வேலை வாய்ப்புகளுக்காக இந்திய குடிமைப் பணி தேர்வுகள் (UPSC), இந்திய பொறியியல் பணித் தேர்வுகள், தமிழ்நாடு அரசுப் பணியாளர் தேர்வாணையம் நடத்தும் தேர்வுகள் (TNPSC), மத்திய அரசுப் பணியாளர் தேர்வாணையத்தின் தேர்வுகள் என பல்வேறு தேர்வுகள் நடத்தப்படுகின்றன. இதேபோல் வங்கிப் பணிகளுக்கான தேர்வுகள், ரயில்வே பணிகளுக்கு தேர்வுகள் உள்ளிட்ட தேர்வுகளும் நடத்தப்படுகின்றன.

இந்தத் தேர்வுகளை எழுதுவதற்காக தயாராகி வரும் போட்டியாளர்களுக்கு உதவும் வகையில், தனி அலைவரிசை ஏற்படுத்தப்படும் என கல்வி தொலைக்காட்சி அறிவித்திருந்தது. இந்நிலையில், கல்வித் தொலைக்காட்சியில் புதிய அலைவரிசையை உருவாக்க தமிழக அரசு அரசாணை வெளியிடப்பட்டுள்ளது. புதிய அலைவரிசையை ஏற்படுத்துவதற்கான பணிகளை மேற்கொள்ள 50 லட்சம் ரூபாய் ஒதுக்கீடும் தமிழக அரசு சார்பில் செய்யப்பட்டுள்ளது குறிப்பிடத்தக்கது.