பாக். அடுத்த பிரதமர் யார்?.. நவாஸ் தலைமையில் ஆலோசனைக் கூட்டம்

பாகிஸ்தானின் அடுத்த பிரதமரைத் தேர்ந்தெடுக்க நவாஸ் ஷெரீஃப் தலைமையில் ஆலோசனைக் கூட்டம் இரண்டாவது நாளாக இன்றும் நடைபெற உள்ளது. 

பனாமா ரகசிய ஆவணங்கள் தொடர்பான வழக்கில் சிக்கிய பாகிஸ்தான் பிரதமர் நவாஸ் ஷெரீஃபை தகுதி நீக்கம் செய்து அந்நாட்டு உச்ச நீதிமன்றம் உத்தரவிட்டது. இதையடுத்து புதிய பிரதமரைத் தேர்வு செய்யும் பணிகளில் ஆளும் முஸ்லீம் லீக் கட்சியினர் ஈடுபட்டுள்ளனர். நவாஸ் ஷெரீஃப் தலைமையில் நேற்று நடைபெற்ற கூட்டத்தில் முடிவு எடுக்கப்படவில்லை என்று கூறப்படுகிறது. இதையடுத்து இரண்டாவது நாளாக நவாஸ் ஷெரீஃப் தலைமையில் இன்றும் ஆலோசனை கூட்டம் நடைபெற இருப்பதாக முஸ்லீம் லீக் கட்சியின் மூத்த தலைவரான கவாஜா சயீத் ரஃபீக் தெரிவித்தார். நேற்றைய கூட்டத்தில் பாகிஸ்தானின் புதிய பிரதமராக தனது சகோதரரான ஷேபாஸ் ஷரீஃபின் பெயரை நவாஸ் முன்மொழிந்ததாகத் தகவல்கள் வெளியாகியுள்ளன. பஞ்சாப் மாகாண முதலமைச்சராகப் பதவி வகித்துவரும் ஷேபாஸ், உடனடியாக பாகிஸ்தான் பிரதமராகப் பதவியேற்க முடியாது. அந்நாட்டு சட்டப்படி, நாடளுமன்ற உறுப்பினர் ஒருவரே பிரதமராக பதவியேற்க முடியும். எனவே, நாடாளுமன்ற உறுப்பினராக ஷேபாஸ் தேர்ந்தெடுக்கப்படும்வரை இடைக்கால பிரதமர் ஒருவர் தேர்ந்தெடுக்கப்படுவார் என்று தெரிகிறது.