காய்ச்சலால் நோயாளிகளின் எண்ணிக்கை அதிகரிப்பு - கிருஷ்ணகிரியில் டெங்கு தடுப்பு பணிகள் தொடக்கம்

கிருஷ்ணகிரி மாவட்டத்தில் காய்ச்சல் மற்றும் இருமல் காரணமாக அரசு மருத்துவமனைக்கு வரும் நோயாளிகளின் எண்ணிக்கை 20 சதவீதம் அதிகரித்துள்ளது. 

சமீபகாலமாக டெங்கு காய்ச்சல் தமிழகத்தின் பல்வேறு பகுதிகளில் பரவி வருகிறது. கடலூரில் 100-க்கும் அதிகமானோர் திடீரென காய்ச்சலால் பாதிக்கப்பட்டு மருத்துவமனையில் அனுமதிக்கப்பட்டனர். காய்ச்சலால் பாதிக்கப்பட்டவர்களுக்கு ரத்த பரிசோதனை நடைபெற்றது. பரிசோதனை முடிவில் 9 பேருக்கு டெங்கு உறுதியாகி இருப்பது தெரியவந்தது. 

அதேபோல் சென்னை ராஜீவ் காந்தி அரசு மருத்துவமனையிலும் தினந்தோறும் 3 அல்லது 4 பேர் வரை டெங்கு பாதிப்பால் அனுமதிக்கப்படுவதாக அம்மருத்துவமனையின் டீன் தெரிவித்திருந்தார். 

இந்நிலையில், கிருஷ்ணகிரி மாவட்டத்தில் அண்மையில் பெய்ந்த பருவமழை சீதோஷன நிலை மாற்றம் காரணமாக வைரஸ் காய்ச்சல் மற்றும் இரும்பல் காரணமாக அரசு மருத்துவமனைக்கு வரும் நோயாளிகள் எண்ணிக்கை 20% அதிகரித்துள்ளதாக தெரிவிக்கப்பட்டுள்ளது. மேலும் மாவட்ட நிர்வாகம் சார்பில் தீவிர சுகாதார பணிகள் மற்றும் சிறப்பு மருத்துவ முகாம் நடத்த நடவடிக்கை எடுக்கப்பட்டுள்ளதாகவும் டெங்கு தடுப்பு பணிகள் தொடங்கப்பட்டுள்ளதாகவும் சுகாதாரத்துறை தெரிவித்துள்ளது.