ஜெயலலிதா மரணம் குறித்த விசாரணை: அப்போலோ வரவேற்பு

மறைந்த முன்னாள் முதலமைச்சர் ஜெயலலிதாவின் மரணம் குறித்து விசாரணை ஆணையம் அமைக்கப்படும் என்ற அறிவிப்பை அப்போலோ மருத்துவமனை வரவேற்றுள்ளது.

ஜெயலலிதா மரணம் குறித்து விசாரிக்க ஓய்வு பெற்ற நீதிபதி தலைமையில் ஆணையம் அமைக்கப்படும் என முதலமைச்சர் எடப்பாடி பழனிசாமி அறிவித்திருந்தார். இந்த அறிவிப்பை அப்போலோ மருத்துவமனை வரவேற்றுள்ளது. 
இது தொடர்பாக அப்போலோ வெளியிட்டுள்ள செய்திக் குறிப்பில், முதலமைச்சரின் அறிவிப்பு ஒரு நல்ல நடவடிக்கை என கூறியுள்ளது. சென்னை, டெல்லி எய்ம்ஸ், பிரிட்டன் மற்றும் அமெரிக்காவில் இருந்து சிறந்த மருத்துவர்கள் வந்து சிகிச்சை அளித்தனர் என தெரிவித்துள்ள அப்போலோ, ஜெயலிதாவுக்கு மிகச்சிறப்பான சிகிச்சை அளித்தும் அவரைக் காப்பாற்ற முடியாதது வருத்தமளிக்கிறது எனக் கூறியுள்ளது. 
விசாரணையின் மூலம் தேவையற்ற யூகங்களுக்கு முற்றுப்புள்ளி வைக்கப்படும் எனவும் அப்போலோ வெளியிட்டுள்ள செய்திக் குறிப்பில் தெரிவித்துள்ளது.