'உயர் ரக வாகனங்கள்தான் குறி; வெளியூரில் விற்றுவிடுவோம்' - சென்னையில் சிக்கிய வாகன திருடன்

சென்னை சுற்றுவட்டாரப் பகுதிகளில் உயர் ரக வாகனங்களை திருடிய கொள்ளை கும்பலைச் சேர்ந்த 17 வயது சிறுவன் கைது செய்யப்பட்ட நிலையில் இருவர் தப்பியோடினர்.

சென்னை குமரன் நகர் அருகே குடியிருப்பு பகுதியில், உயர் ரக 'கே.டி.எம்' இருசக்கர வாகனத்தை திருடி 3பேர் ஓட்டிசெல்வது தெரியவந்தது. பொதுமக்கள் அளித்த புகாரின்பேரில் அசோக் நகர் ஆஞ்சிநேயர் கோவில் அருகே, இருசக்கர வாகனத்தில் வந்துகொண்டிருந்தபோது 3 பேரை காவல்துறையினர் விரட்டி பிடித்தனர். அப்போது, இரண்டு பேர் தப்பியோடிவிட்டனர். பிடிப்பட்ட 17வயது சிறுவனிடம் காவல்துறையினர் விசாரணை நடத்தியதில், 'கிண்டி, சைதாப்பேட்டை, அசோக் நகர் உள்ளிட்ட பகுதிகளில் வீட்டின் முன்பிருக்கும் உயர் ரக வாகனங்களை திருடிச் செல்வோம்' என சிறுவன் உண்மையை ஒப்புக்கொண்டுள்ளார்.

மேலும், 'அந்த வாகனங்களை, ஆளில்லா பார்க்கிங் பகுதிகளில் நிறுத்திவிட்டு, சில நாட்கள் கழித்து அதனை வெளியூர்களுக்கு விற்றுவிடுவோம்' என சிறுவன் கூறியது காவலர்களுக்கு அதிர்ச்சியை ஏற்படுத்தியது. பின்னர், கெல்லீஸில் உள்ள சிறுவர் சீர் திருத்த பள்ளியில் சிறுவன் அடைக்கப்பட்டார். மேலும் தப்பியோடிய இருவரும் அயனாவரம் மற்றும் அம்பத்தூர் பகுதியை சேர்ந்த ராபர்ட் மற்றும் ஜான் என்பதும், அவர்கள் மீது பல்வேறு காவல் நிலையங்களில் இருசக்கர வாகனங்கள் திருடிய வழக்கு நிலுவையில் உள்ளதும் தெரியவந்தது. இதனையடுத்து, அவர்கள் இருவரையும் காவல்துறையினர் தேடி வருகின்றனர்.

இதையும் படிக்கலாமே: வெளியானது மணி ஹெய்ஸ்ட் 5வது பாகம் - நெட்ஃபிளிக்ஸில் முகாமிட்ட ரசிகர்கள்!