ஆட்சியை கலைக்கக் கோருவது முறையல்ல: திமுக மீது தமிழிசை குற்றச்சாட்டு

திமுக எதிர்க்கட்சியாக செயல்படவில்லை என்றும், ஒரு குறுந்தகடை வைத்துக் கொண்டு ஆட்சியை கலைக்க வேண்டும் என கோருவது முறையல்ல எனவும் தமிழக பாஜக தலைவர் தமிழிசை சவுந்தரராஜன் கூறினார்.

மதுரையில் செய்தியாளர்களை சந்தித்த தமிழிசை, மற்றவர்கள் மீது ஊழல் புகார் கொடுக்க திமுகவுக்கு எந்த தார்மீக உரிமையும் இல்லை எனக் கூறினார். மேலும், “எதிர்க்கட்சியாக திமுக செயல்படவில்லை. ஒரு குறுந்தகடை வைத்துக் கொண்டு தினமும் சட்டப்பேரவையில் இருந்து வெளியேறுவது முறையல்ல. யாரும் ஊழலுக்கு ஒத்துப் போவது கிடையாது. ஊழல் செய்திருந்தால் ஆட்சி தொடர்வது நல்லதல்ல. ஆனால் ஊழல் குற்றச்சாட்டுக் கூறுவதற்கு ஒரு உரிமையும், தகுதியும் இருக்க வேண்டும். நிச்சயமாக திமுகவுக்கு, சிடியைப் பற்றிப் பேசுவதற்கோ, ஊழலைப் பற்றி பேசுவதற்கோ, முறைகேடுகளைப் பற்றிப் பேசுவதற்கோ எந்த தார்மீக உரிமையும் இல்லை” என்றார்.