“அரசுக்கு நிலம் கொடுத்ததற்காக இடஒதுக்கீட்டில் அரசுப்பணி கோரக்கூடாது” - உயர்நீதிமன்றம்

அரசு பயன்பாட்டிற்கு நிலம் ஒதுக்கியவர்களுக்கு, அரசு வேலைவாய்ப்புகளில் இடஒதுக்கீடு வழங்க கோருவது, அரசியல் சாசன உரிமை அல்ல என சென்னை உயர் நீதிமன்றம் தெளிவுபடுத்தியுள்ளது.

அரசு பள்ளிகளில் ஆசிரியர்கள் பணியிடங்களுக்கு விண்ணப்பங்களை வரவேற்று ஆசிரியர் தேர்வு வாரியம் அறிவிப்பாணை வெளியிட்டது. இதனை எதிர்த்து அப்துல் காதர் என்பவர் சென்னை உயர் நீதிமன்றத்தில் மனுத்தாக்கல் செய்திருந்தார். அந்த மனுவில் அரசின் திட்டங்களுக்காக நிலம் வழங்கியவர்களுக்கு அரசு வேலைவாய்ப்பில் இடஒதுக்கீடு வழங்கும் வகையில் 1978ஆம் ஆண்டு தமிழக அரசு அரசாணை ஒன்றை பிறப்பித்திருந்ததை குறிப்பிட்டிருந்தார். அதனடிப்படையில் அரசுக்கு நிலம் வழங்கியவர்களுக்கு இடஒதுக்கீடு வழங்கப்படாததை தெரிவித்திருந்தார்.

பணம் வராத ஆத்திரத்தில் ஏடிஎம் மீது கல்லைத் தூக்கிப் போட்டு உடைத்த நபர்

அத்துடன், கடந்த முறை நடத்தப்பட்ட ஆசிரியர்கள் தேர்வில் கூட, இந்த இடஒதுக்கீடு நடைமுறை பின்பற்றப்பட்டதாக குறிப்பிட்டிருந்தார். இந்த மனுவை விசாரித்த நீதிபதி ஆனந்த் வெங்கடேஷ், இடஒதுக்கீடு வழங்கும்படி அரசை நிர்பந்திக்க முடியாது என்றும், நிலம் வழங்கியவர்களுக்கு அரசு பணியில் இடஒதுக்கீடு வழங்க வேண்டும் என்பது அரசியல் சாசன உரிமையும் அல்ல என தெரிவித்தார். மேலும், இட ஒதுக்கீடு வழங்குவது தொடர்பாக சம்பந்தப்பட்ட துறைகள் முடிவு செய்து கொள்ளலாம் எனவும் கூறி மனுவை தள்ளுப்படி செய்து உத்தரவிட்டார்.