கடந்த 6 மாதங்களில் மத்திய அமைச்சர்களின் செயல்பாடு எப்படி? - பிரதமர் ஆய்வு

கடந்த ஆறு மாதங்களில் மத்திய அமைச்சர்களின் செயல்பாடுகள் குறித்து பிரதமர் நரேந்திர மோடி ஆய்வு செய்தார்.

பிரதமர் நரேந்திர மோடி தலைமையிலான பாஜக அரசு இரண்டாவது முறையாக பொறுப்பேற்று ஆறு மாதங்கள் நிறைவடைந்துள்ள நிலையில், அது குறித்த ஆய்வுக்கூட்டம் டெல்லியில் நடைபெற்றது. இதில் வேளாண்மை, ஊரக வளர்ச்சி மற்றும் சமூக நலத்துறை ஆகிய துறைகளில் முக்கிய கவனம் செலுத்தப்பட்டது.

அப்போது அமைச்சர்கள் தாங்கள் எடுத்த பல்வேறு நடவடிக்கைகள், நிறைவேற்றப்பட்ட திட்டங்கள் குறித்து பிரதமரிடம் விளக்கம் அளித்தனர். காலையில் தொடங்கிய ஆய்வுகூட்டம் மாலை வரை நீடித்தது. குடியுரிமை திருத்தச் சட்டம் மற்றும் தேசிய அளவில் குடிமக்கள் பதிவேடுக்கான கணக்கெடுப்பு ஆகியவற்றிற்கு எதிராக நாடு முழுவதும் போராட்டம் நடந்துவரும் வேளையில் இந்த ஆய்வு கூட்டம் நடைபெற்றது.

ஆனால், இந்தக் கூட்டத்தில் இந்தப் பிரச்னை குறித்து விவாதிக்கப்பட்டதா என்பது குறித்த விவரம் எதுவும் வெளியாகவில்லை.