ரஜினி பேச்சு முதல்.. உள்ளாட்சித் தேர்தல் வேட்புமனு நிறைவு வரை..

உள்ளாட்சித் தேர்தலுக்கான வேட்புமனுத் தாக்கல் நேற்று மாலையுடன் நிறைவடைந்தது. கடைசி நாள் என்பதால் மனுத்தாக்கல் செய்ய ஊராட்சி ஒன்றிய அலுவலகங்களில் ஏராளமானோர் குவிந்தனர். வேட்புமனுக்கள் மீது இன்று பரிசீலனை நடைபெறவுள்ளது.

உள்ளாட்சித் தேர்தல் விவகாரத்தில் மாநிலத் தேர்தல் ஆணையருக்கு எதிராக உச்சநீதிமன்றத்தில் திமுக நீதிமன்ற அவமதிப்பு வழக்கு தொடர்ந்துள்ளது. உள்ளாட்சித் தேர்தலுக்கான மனுத் தாக்கல் நிறைவடைந்த நிலையில், மாநிலத் தேர்தல் ஆணையர் பழனிசாமிக்கு எதிராக திமுக உச்சநீதிமன்றத்தில் நீதிமன்ற அவமதிப்பு வழக்கு தொடர்ந்துள்ளது.

ஊரக உள்ளாட்சித் தேர்தல் தொடர்பான புகார்களை தெரிவிக்க இலவச தொலைபேசி எண்கள் அறிவிக்கப்பட்டுள்ளன.'

குடியுரிமை சட்டத்தை எதிர்த்து டெல்லி ஜாமியா பல்கலைக்கழக மாணவர்களின் போராட்டம் நீடிக்கும் நிலையில் மாணவர்களை அரசியல் கட்சிகளின் தலைவர்கள் சந்தித்து பேசினர்.

சட்டம், ஒழுங்கை காக்க அனைத்து நடவடிக்கைகளையும் எடுக்குமாறு மாநில அரசுகள், யூனியன் பிரதேசங்களுக்கு மத்திய உள்துறை அமைச்சகம் அறிவுறுத்தியுள்ளது. 

சென்னை பல்கலைக்கழகத்தில் படித்த லெஃப்டினென்ட் ஜெனரல் மனோஜ் முகுந்த் நராவனே நாட்டின் அடுத்த ராணுவ தளபதியாக பொறுப்பேற்பார் என தகவல்கள் வெளியாகியுள்ளன.

அரசியலில் நுழைய வேண்டாம் என நடிகர் அமிதாப் பச்சன் கூறிய அறிவுரையை தம்மால் பின்பற்ற முடியவில்லை என நடிகர் ரஜினிகாந்த் தெரிவித்துள்ளார். தமக்கு நடிகர் அமிதாப் பச்சன் வழிகாட்டியாக இருந்து வருகிறார் என்றும், அவர் பின்பற்றி வரும் 3 விஷயங்களை தமக்கு அறிவுரையாக கூறினார் என்றும் தெரிவித்தார்.