அமளிக்கிடையே பட்ஜெட் தாக்கல் செய்த அருண்ஜேட்லி..!

நாடாளுமன்றத்தில் எதிர்க்கட்சிகளின் அமளிக்கிடையே மத்திய பட்ஜெட்டை நிதியமைச்சர் அருண் ஜேட்லி தாக்கல் செய்தார்.

நாடாளுமன்றத்தில் நேற்று குடியரசுத்தலைவர் உரையாற்றிக் கொண்டிருந்தபோது இந்தியன் யூனியன் முஸ்லீம் லீக் கட்சி எம்.பி. ஈ.அகமது திடீரென மயங்கி விழுந்தார். உடனடியாக மருத்துவமனையில் அனுமதிக்கப்பட்ட அவர் இன்று காலை உயிரிழந்தார். மத்திய பட்ஜெட் இன்று தாக்கல் செய்யப்படும் நிலையில், எம்.பி ஒருவர் உயிரிழந்து இருப்பதால், அவை இரங்கல் தெரிவிக்கப்பட்டு ஒத்திவைக்கப்படுமா? அல்லது பட்ஜெட் திட்டமிட்டபடி இன்று தாக்கல் செய்யப்படுமா? என்ற கேள்வி எழுந்தது.

இத்தகைய சூழ்நிலையில் நாடாளுமன்றக் கூட்டம் காலை 11 மணிக்கு தொடங்கியது. அப்போது மறைந்த எம்.பி அகமது மறைவிற்கு இரங்கல் தெரிவிக்கப்பட்டது. இதனையடுத்து நாடாளுமன்றத்தை ஒத்திவைக்க காங்கிரஸ் சார்பில் கோரிக்கை வைக்கப்பட்டது. ஆனால் இன்று பட்ஜெட் தாக்கல் செய்யப்படுவதால், எம்.பி.அகமது-விற்கு மரியாதை செலுத்தும் வகையில் நாளை அவை ஒத்திவைக்கப்படும் என சுமித்ரா மகாஜன் தெரிவித்தார். இதனையடுத்து எதிர்க்கட்சிகளின் அமளிக்கிடைய மத்திய பட்ஜெட்டை நிதியமைச்சர் அருண் ஜேட்லி தாக்கல் செய்தார்.